एजेन्सी, बैशाख १२
साउदी अरबमा एकै दिनमा ३७ जनालाई मृत्युदण्ड दिइएको छ भने एक जनालाई मृत्युदण्ड पश्चात् सुलीमा चढाइएको छ । अधिराज्यको गृह मन्त्रालयले जारी गरेको विज्ञप्ति अनुसार सुरक्षा व्यवस्था भड्काउने काम गरेको आरोपमा ३७ जनालाई मृत्युदण्ड दिइएको हो ।
राज्यको कानुन अनुसार अत्यन्त जघन्य अपराध गरेको आरोपमा ३७ मध्ये एक जनालाई भने मृत्युदण्डपछि सुलीमा चढाइएको हो । मत्युदण्डको सजाय पाएका अधिकांश साउदी अरबका हुन् । मृत्यु दण्ड दिइएका मध्ये ११ जनालाई इरानको जासुसी गरेको आरोप छ ।
वर्तमान युवराज मोहमद बीन सलमानले आलोचकहरुविरुद्ध तीव्र धरपकड सुरु गर्ने क्रम जारी राखेसँगै कयौँ व्यक्ति धरपकडमा परेका छन् । मृत्युदण्ड दिने सवालमा साउदी अरब विश्वमै अग्रस्थानमा आउँछ । सन् २०१६ जनवरीमा उसले ४७ सम्मलाई मृत्युदण्ड दिएको इतिहास छ ।
