काठमाडौँ, बैशाख २७
‘मिस नेपाल २०१९’ को उपाधि अनुष्का श्रेष्ठले जितेकी छन् । मिस नेपालको अन्तिम प्रतिस्पर्धामा सहभागी २४ प्रतिस्पर्धीलाई उछिन्दै अनुष्काले मिस वल्र्डको उपाधि जितेकी हुन् । अनुष्कालाई मिस नेपाल २०१८ की शृंखला खतिवडाले ताज पहिराएकी थिइन् ।
कार्यक्रमका मुख्य निर्णायक इला शर्माले सोधेको ‘हामीले अधिकार भन्दा कर्तव्यलाई ध्यान दियौं भने यो संसार राम्रो बन्न सक्छ होला, तपाई यसमा के भन्नुहुन्छ ? भन्ने प्रश्नको उत्कृष्ट जवाफ दिदै अनुष्काले उपाधि जितेकी हुन् । उनी मिस नेपालमा सहभागी हुन अस्ट्रेलियाको बैँकबाट राजीनामा दिएर आएकी थिइन् । अनुष्काले अब मिस वल्र्डमा नेपालको प्रतिनिधित्व गर्नेछिन् ।
यस्तै, यो बर्षको ‘मिस नेपाल यूनिभर्स’को उपाधि प्रदिप्ता अधिकारीको पोल्टामा गएको छ । ‘मिस नेपाल अर्थ’को उपाधि रिया बस्नेतले जितिन् भने र ‘मिस नेपाल इन्टरनेशनल’को उपाधि मिरा कक्षपतिले जितिन् ।
मिस नेपाल सुपर नेशनलको उपाधि भने रोज लामाले जितिन् । सहभागी २५ सुन्दरीमध्ये टप ७ मा पुगेकामध्ये ५ जनालाई यी उपाधि दिइएको थियो । २५ प्रतिस्पर्धीमध्ये १५ हुँदै अन्तिममा ७ जना छानिएका थिए । अन्तिम ७ मा अनुष्का श्रेष्ठ, रक्षा उप्रेती, रोज लामा, प्रदिप्ता अधिकारी, सोफिया भुजेल, रिया बस्नेत र मिरा कक्षपति पुगेका थिए । हिडन ट्रेजरले आयोजना गरेको मिस नेपाल प्रतियोगिताको यो २५ औं संस्करण हो ।
नेपालकै सबैभन्दा ठूलो सौन्दर्य प्रतियोगीता मानिने ‘मिस नेपाल’को यो श्रृङ्खलामा अश्मी श्रेष्ठ, सन्नी रौनियार प्रधान, ओम बहादुर भन्डारी, तुविजा अग्रवाल, राजिव शाह, नवराज सिलवाल, विदुषी राना, पवन बहादुर पाण्डे, सुनिता लिम्बु खरेल र अनुप विक्रम शाही सहभागी थिए ।
यसपटकको ‘मिस नेपाल’को आयोजना किर्तिपुरमा रहेको ‘लेब्रोटरी स्कुलको घाँसे मैदानमा आयोजना गरिएको थियो । यसपटक दर्शकलाई समेत टिकट किनेर कार्यक्रम हेर्ने मौका आयोजकले दिएको थियो ।‘मिस नेपाल’ आयोजनाको २५ औं बर्ष पुगेको अवसरमा यसपटक पूर्व मिस नेपालहरुलाई समेत सुरुवातमै स्टेजमा निमन्त्रणा गरिएको थियो ।
‘मिस नेपाल २०१९’को अन्य विभिन्न टाइटलका विजेताहरु :
१. मिस फ्रेन्डसिपः न्यान्सी बोगटी
२.मिस ब्यूटिफूल हेयरः मिरा कक्षपति
३. मिस ग्ल्यामरः रोज लामा
४. मिस फोटोजेनिकः रोज लामा
५. मिस इन्टिलेक्चुअलः अनुष्का श्रेष्ठ
६. मिस न्याचुरल स्किनः जेनी महर्जन
७. मिस एथेलेटिक्सः प्रदिप्ता अधिकारी
८. मिस कन्फिडेन्टः निशा पाठक
९. मिस पपलुर च्वाइसः रिया बस्नेत
१०. मिस ट्यालेन्टः प्रदिप्ता अधिकारी
११. मिस फ्यासिनोः अनुष्का श्रेष्ठ
१२. ब्यूटी विथ दि प्रपोजः निकिता कर्माचार्य
