२८ जेष्ठ २०७६ इटहरी : इटहरी उपमहानगरपालिकका मेयर द्वारिकलाल चौधरीले पत्रकारलाई दिएको धाकधम्कीको विषयमा सत्यतथ्य पत्ता लगाउन नेपाल पत्रकार महासंघले गठन गरेको मिसन टोलीले आफ्नो प्रतिवेदन बुझाएको छ ।
पत्रकार विराट अनुपम गौतमले इटहरीका मेयर द्वारिकलाल चौधरीलाई फोन गरेर उत्तेजित गराएको भन्दै नेपाल पत्रकार महासंघले पत्रकारको गल्ती औंल्याएको छ । महांघको मिसनले मेयर चौधरीको समेत कमजोरी औंल्याएको छ । इटहरीका पत्रकार गौतमले फेसबुक स्टाटसमा दिने निजी अभिव्यक्तिले विभिन्न व्यक्तिको मानमर्दन हुने गरेको समेत पत्रकार महासंघको प्रतिवेदनमा उल्लेख छ । मिसन टोलीको निश्कर्षको तेस्रो नम्बर बुँदामा ‘पत्रकार विराट अनुपमले फेसबुकमा लेखेको स्टाटसमा प्रमुख द्वारिकलाल चौधरीले कमेन्ट गरेको विषयलाई फोन गरेर उत्तेजित बनाएको पाइयो । साथै पत्रकार विराट अनुपमले पटक–पटक सामाजिक सञ्जाल फेसबुकमा दिने निजी अभिव्यक्ति तथा धारणाले थुप्रै पत्रकार र सामाजिक व्यक्तिको मानमर्दन र प्रतिष्ठामा आघात पुगेको गुनासा थुप्रै पाइएको उल्लेख गरिउको छ । मिसनको सुझावमा पत्रकारले रिपोर्टिङ गर्दा र अन्तरवार्ता लिने क्रममा व्यक्तिलाई होच्याउने गरी अशिष्ट, अमर्यादित र पूर्वाग्रही प्रश्न गर्नु हुँदैन भनिएको छ ।
विभिन्न समयमा कतिपय पत्रकारले आचार संहिता र पेशागत मर्यादा पालन नगर्दा समग्र पत्रकारिता जगत नै आलोचित भइरहेको भन्दै मिसनले पत्रकार महासंघले जिल्ला शाखामा गुनासो सुनुवाई शाखा निर्माण गर्नुपर्ने सुझाव समेत दिएको छ ।प्रतिवेदनले पत्रकार एवं सञ्चार जगतले लेखेको र प्रश्न सोधेको आधारमा अनावश्यक आवेग, उत्तेजना र दुर्व्यवहारमै उत्रने कमजोरी मेयर चौधरीले सुधार गर्नुपर्ने सुझाव दिएको छ । यस्तै, पत्रकारिता पेशाको मर्यादा र विश्वसनीयता कायम गराउनका लागि सम्पूर्ण सञ्चारकर्मीहरुलाई पूर्णरुपले आचारसंहिता पालना गराउन, पत्रकारको शद्धीकरण गर्न, पित पत्रकारितालगायतका विकृति नियन्त्रण गर्न, दक्षता बढाउने विशेष तालिम सञ्चालन गर्न पत्रकार महासंघको केन्द्र, प्रदेश र जिल्ला शाखाले विशेष योजना ल्याउन पनि सुझाव दिइएको छ ।
