साउन १७, एजेन्सी । भारतीय अभिनेत्री दीया मिर्जाले विवाहको पाँच वर्षपछि श्रीमान् साहिल सांघासँग छुट्टिएको घोषणा गरेकी छिन् ।
दीया र साहिलले आपसी समझदारीमा छुट्टिने निर्णय गरेका हुन् । दीयाले सामाजिक सञ्जाल मार्फत् आफूहरु छुट्टिएको जानकारी दिएकी छिन् ।
दीयाले सामाजिक सञ्जालमा ११ वर्षको सुमधर सहयात्रापछि दुवैको आपसी समझदारीमा छुट्टिने निर्णय लिएको लेखेकी छन् । साथै उनीहरुले सदैव असल साथी हुने र एकअर्काप्रतिको माया र सम्मानको भावना सदैव रहनेर अब यात्राले दुवैलाई छुट्टाछुट्टै बाटोतर्फ लैजान सक्छ भन्दै जति पनि समय एकसाथ बिताए त्यसका लागि आभारी रहेको बताएकी छन् ।
उनले थप लेखेकी छन्, ‘हामी हाम्रा परिवार तथा साथीभाइलाई उहाँहरुको माया र समझदारीका लागि धन्यवाद दिन चाहन्छौँ । मिडियासँग हामी हाम्रो गोपनीयताको सम्मान गरिदिनु हुन आग्रह गर्दछौँ । अब हामी कुनै पनि प्रतिक्रिया दिनेछैनौंँ’ ।
दीया मिर्जाको यो बयानले अहिले बलिउड जगत् तथा उनका समर्थकहरु आश्चर्यमा छन् ।
दीयाले सन् २०१४ अक्टुबर १८ मा उनका बिजनेस पार्टनर साहिल सांघासँग दिल्लीमा विवाह गरेकी थिइन् । साथै केही दिनअघि मात्रै जुलाई १६ मा पति साहिल सांघालाई जन्मदिनको शुभकामना दिँदै इन्स्टाग्राममा दुवैको सुन्दर तस्बिर सहितको मायाले भरिपूर्ण पोस्ट शेयर गरेकी थिइन् ।
दीया मिर्जा र साहिल सांघा ११ वर्षदेखि एकअर्काको साथमा थिए । लामो समयको प्रेम सम्बन्धपछि उनीहरुले सन् २०१४ मा विवाह गरेका थिए ।
दीया र साहिलको बर्न फ्री एन्टरटेन्मेन्ट नामको प्रोडक्शन कम्पनी छ । उक्त प्रडक्शन कम्पनीको पहिलो फिल्म ‘लब ब्रेकअप जिन्दगी’ हो ।
दीया मिर्जाले फिल्म ‘दिवानापन’, ‘तुमको ना भूल पाएंगे’, ‘दम’, ‘परिणीता’, ‘फिर हेरा फेरी’, ‘लगे रहो मुन्ना भाई’ र ‘सञ्जु’ जस्ता फिल्ममा काम गरेकी छिन् ।
