२१ भदौ, एजेन्सी ।
दक्षिण अमेरिकाका सात देश अमेजन रेनफरेस्टको संरक्षणका लागि एकीकृत प्रयास गर्न सहमत भएका छन्।
अमेजन रेनफरेस्टमा लागेको भीषणा आगलागी र त्यसमा विश्वव्यापी रुपमा व्यक्त भएको चासो र चिन्ताको परिवेशमा सात दक्षिण अमेरिकी देश जंगल संरक्षणका लागि सक्दो प्रयास गर्न सहमत भएका हुन् ।
बोलिभिया, ब्राजिल, कोलम्बिया, इक्वेडर, गायाना, पेरु र सरिनामले सहमति पत्रमा हस्ताक्षर गरेका हुन् । उनीहरुले अमेजन रेनफरेस्टको अवस्था निगरानी गर्नका लागि डिजास्टर रेस्पोन्स नेटवर्क र स्याटेलाइट मोनिटरिङ्ग गर्ने गरी सहमति गरेका हुन्।
कोलम्बियामा भएको सम्मेलनमा यी देशबिच वृक्षारोपण गर्ने सम्बन्धमा पनि सहमति भएको छ । अमेजन रेनफरेस्टमा यो वर्ष ८० हजार भन्दा बढी डढेलोका घटना भएका छन् ।
कोलम्बियाका राष्ट्रपति इभान डुकेले भनेका छन्, ‘अमेजन रेनफरेस्टसँग जोडिएका राष्ट्रका राष्ट्रपतिहरुको सहकार्य गर्ने मेकानिजमका रुपमा यो बैठक जीवित रहने छन् ।’
यस्तै पेरुका राष्ट्रपति मार्तिन विज्काराले अमेजन रेनफरेस्ट जोगाउने कार्य अब एक्लै सम्भव नरहेको र त्यसका लागि सहकार्यको सुरुवात भएको बताएका छन् । सम्मेलनमा सात देशका राष्ट्रपति, उपराष्ट्रपति र मन्त्रीहरुको सहभागिता थियो ।
शुक्रबार भएको सम्मेलनमा ब्राजिलका राष्ट्रपति जायर बोल्सोनारो भने शल्यक्रियाका कारण सम्मेलनमा सहभागी हुन पाएनन् । तर उनी भिडियो लिंक मार्फत छलफलमा सहभागी भएका थिए ।
सात देशबिच सचेतना तथा शैक्षिक अवस्था सुधार गर्ने तथा वन संरक्षणमा आदिवासी समुदायका भूमिका बिस्तार गर्ने सम्बन्धमा पनि सहमति बनेको छ ।
