२३ असोज, एजेन्सी।
भारतको केरलामा १७ वर्षकी एक युवतीलाई विवाह गर्न नमानेको भन्दै जिउँदै जलाइएको घटना सार्वजनिक भएको छ ।
युवती देविकालाई उसका नातेदार समेत रहेका २६ वर्षका मिधुनले शरीरमा आगो लगाएर हत्या गरेको प्रहरीले जनाएको छ ।
युवतीलाई जिउँदै जलाएर हत्या गरे पछि मिधुनले आफ्नै शरीरमा पनि आगो लगाएर आत्महत्या गरेको भारतीय प्रहरीले जनाएको छ । शरीरमा आगो लागेपछि घाइते भएका दुवैजनालाई अस्पताल लगिएको थियो जहाँ उपचारका क्रममा उनीहरुको मृत्यु भयो ।
देविकालाई बचाउने क्रममा उनका बुवा समेत घाइते भएका छन् । प्रहरीका अनुसार मिधुन देविकासँग विवाह गर्न चाहन्थे तर परिवारले स्वीकारेन । परिवारले नमाने पनि मिधुनले विवाह गर्ने जिद्यि गरे । यो विवाद प्रहरीसम्म पुग्यो ।
प्रहरीले दुवै पक्षलाई बोलाएर छलफल गरेपछि मिधुनले देविकालाई विवाहको कुरामा नसताउने सहमति गरे । त्यसको केही दिनपछि अचानक मिधुन देविकालाई भेट्न उनको घर पुगे तर देविकाका बुवाले रोके ।
जब देविका घर बाहिर आइन् मिधुनले देविकाको शरीरमा पेट्रोल छर्केर आगो लगाए त्यसपछि उनले आफ्नै शरीरमा पनि पेट्रोल छर्केर आगो लगाएको बताइएको छ ।
