२७ असोज, विराटनगर ।
प्रदेश १ को राजधानी रहेको विराटनगरमा अझै पनि उपभोक्ता ठगिदै आएका छन् । विराटनगर – ९ जहदा रोडस्थित न्युरो हस्पिटल अगाडी रहेको साक्षी मेडिकलले औषधिमा लेखिए भन्दा बढी बिल बनाएर उपभोक्ता ठग्ने गरेको पाईएको छ ।
उपभोक्ताले लिएको औषधीको बिललाई केरमेट गरी औषधिको मूल्य र परिमाण बढाएर उपभोक्ता ठगेको आरोपमा मेडिकलका कर्मचारी सुनसरीको भोक्राहा नर्सिङ गाउँपालिका–३ का १९ वर्षीय सन्तोष मेहतालाई प्रहरीले पक्राउ गरेको छ ।
प्रहरीले ३ जना विरुद्ध मुद्धा दर्ता गरेकोमा मेडिकल सञ्चालक सप्तरीका चन्द्रशेखर यादव र सिरहा गोलबजारका निरन्जन शाक्य फरार रहेका छन् । उनीहरुको खोजी भईरहेको जिल्ला प्रहरी कार्यालय मोरङका एसपी विश्व अधिकारीले जानकारी दिए ।
उदयपुर त्रियुगा नगरपालिका–७ बस्ने २३ वर्षीय नवराज राईलाई सवारी दुर्घटनामा परी न्युरो अस्पताल विराटनगर ल्याईएको थियो । घाईतेको उपचारमा लाग्ने सम्पूर्ण औषधी उक्त मेडिकल हलबाट खरीद गर्न भनि राईका परिवारले अग्रिम २ लाख रुपैँया डिपोजिट राखेका थिए ।
असोज २६ गते डिस्चार्ज भएपश्चात उपचारमा लागेको औषधिको पैसा तिर्न भनि जाँदा औषधी किने बापत दिने बिलमा मूल्य बढाएको शंका लागि हेर्दा औषधिको मूल्य बढाएको भेटिएको जिल्ला प्रहरी कार्यालय मोरङले जनाएको छ । सो आधारमा सच्याएको बिल सहित प्रहरीले मेहतालाई पक्राउ गरेको प्रहरी उपरीक्षक अधिकारीले बताए ।
