विराटनगर, फागुन १२
प्रदेश १ को संसद भवन निर्माणका लागि विराटनगर महानगरपालिकाले जग्गा उपलव्ध गराउने भएको छ । महानगरपालिका परिषदको वोर्ड वैठकले विराटनगर ८ स्थित हाट खोला मैदान संसद भवनका लागि उपलव्ध गराउने निर्णय गरेको हो ।
अहिले विराटनगरमा रहेको जिल्ला समन्वय समितिको हलमा प्रदेशसभाको बैठक कक्ष बनाइएको छ । तर, त्यो पर्याप्त नभएको भन्दै महानगरपालिकाले जग्गा दिने निर्णय विराटनगर महानगरपालिकाका प्रमुख भीम पराजुलीले जानकारी दिए ।
हाट खोलाको जग्गा अहिले सार्वजनिक कार्यक्रम र पार्किङका लागि प्रयोग हुँदै आएको छ । पराजुलीले अहिले अस्थायी रुपमा प्रयोगमा ल्याएको जिससको हलपनि प्रयाप्त नभएकाले प्रदेश संसद भवनको स्थायी संरचना निर्माणका लागि महानगरले संसद सचिवालयलाई जग्गा उपलव्ध गराएर सहयोग गर्ने निर्णय गरेको जानकारी दिए ।
सरकारले प्रदेशको अस्थायी मुकाम विराटनगरलाई तोकेको छ र प्रदेशसभा तथा प्रदेश सरकारका कार्यालयहरु विराटनगरमा नै स्थापना गरिएका छन । यद्यपि प्रदेश राजधानीबारे निर्णय गर्ने अधिकार प्रदेशसभालाई छ । अब प्रदेशसभाले दुई तिहाई बहुमतबाट प्रदेशको नामसँगै स्थायी राजधानी तोक्नेछ ।
