एजेन्सी, कात्तिक ३
इटालियन सिरी ‘ए’ मा पोर्चुगिज स्टार फरवार्ड क्रिस्टियानो रोनाल्डोको गोलसँगै युभेन्टस विजयी भएको छ । युभेन्टसको घरेलु मैदानमा शनिबार राति भएको खेलमा युभेन्टसले बोलोग्नालई २–१ ले पराजित गरेको हो ।
अर्को एक गोल मिरालेम पिजानिकले गोल गरे । बोलोग्नाका डानिलोले सान्त्वना गोल फर्काए । एलिनाज स्टेडियममा खेलको १९औं मिनेटमा रोनाल्डोको गोलबाट युभेन्टसले शुरुवाती अग्रता बनाएको थियो । तर, युभेन्टसको त्यो अग्रता लामो समय टिकेन । २४औं मिनेटमा डानिलोले बराबरी गोल फर्काएपछि पहिलो हाफ १–१ गोलको बराबरीमा सकिएको थियो ।
५४औं मिनेटमा मिरालेम पिजानिकले गोल गर्दै युभेन्टसलाई २–१ को अग्रता दिलाए । त्यसपछि थप गोल निस्कन नसक्दा युभेन्टस विजयी हुन सफल भयो । खेलभन्दा अघि रोनाल्डोले आफ्नो करियरको ७०० गोल अंकित जर्सी सार्वजनिक गरेको थियो ।
जितसँगै युभेन्टस ८ खेलबाट २२ अंक जोडेर शीर्षस्थानमा रहेको छ । पराजित बोलोग्ना ९ अंक जोडेर १२औं स्थानमा छ ।
