६ कात्तिक, विराटनगर ।
ब्यक्ति हत्या गरी फरार रहेका रंगेलीका एक व्यक्तिलाई मोरङ प्रहरीले दुई वर्षपछि पक्राउ गरेको छ । २०७४ असार ११ गते रंगेली नगरपालिका–९ स्थित दर्वेशा–वनकोल जोड्ने सडक खण्डमा मृत भेटिएका ६५ वर्षीय पहाडचन्द राजवंशीको हत्यामा संलग्न भएको आरोपमा प्रतिवादी भरतलाल राजवंशीलाई मंगलबार मोरङ प्रहरीले पक्राउ गरेको हो ।
राजवंशीलाई इलाका प्रहरी कार्यालय रंगेलीबाट खटिएको प्रहरी निरीक्षक लेखनाथ दाहाल नेतृत्वको अनुसन्धान टोलीले मंगलबार बेलुका उनकै घरमा लुकीछिपी बसिरहेको अवस्थामा पक्राउ गरेको जिल्ला प्रहरी कार्यालय मोरङका एसपी विश्व अधिकारीले बुधबार पत्रकार सम्मेलन गरी जानकारी दिए ।
पक्राउ परेका उनलाई इलाका प्रहरी कार्यालय रंगेलीबाट मुलुकी अपराध संहिता २०७४ को ज्यान सम्बन्धि कसुर अन्तर्गत आवश्यक अनुसन्धान तथा कारबाही भईरहेको उनले बताए ।
यस्तो थियो प्रहरीको अनुसन्धान
२०७४ असार ११ गते रंगेली नगरपालिका–९ स्थित दर्वेशा–वनकोल जोड्ने सडक खण्डमा पहाडचन्द राजवंशी टाउको, घाँटी र छातीमा चोट लागी मृत अवस्थामा फेला परेका थिए । मृत ब्यक्ति पहाडचन्द राजवंशी भएको खुलेपश्चात असार १२ गते मृतकको छोरा ३७ वर्षीय लक्ष्मीप्रसाद राजवंशीले जाहेरी दिएका थिए । त्यस समयमा प्रतिवादीको परिचय खुलेको थिएन ।
अपराधी पक्राउ नपरेपछि घटना सम्बन्धी विभिन्न राष्ट्रिय तथा स्थानीय सञ्चार माध्यममा समाचार छापिएको थियो भने प्रहरीले अपराधी पत्ता नलगाएको प्रति व्यापक विरोध भएको थियो । यसको अनुसन्धानमा इलाका प्रहरी कार्यालय रंगेली, जिल्ला प्रहरी कार्यालय मोरङ तथा तत्कालीन क्षेत्रीय प्रहरी कार्यालय विराटनगरबाट समेत अनुशन्धान टोली परिचालन गरिएको थियो ।
घटनाको २० दिन पछिमात्र घटनामा संलग्न व्यक्तिको पहिचान भएको थियो । पहिचान भएपश्चात साउन ३१ गते मृतककी बुहारी २८ वर्षीया चिन्ताकुमारी राजवंशीले प्रतिवादी भरतलाल राजवंशी विरूद्द किटानी जाहेरी दिएकी थिइन् । तत्पश्चात राजवंशी फरार रहेका थिए । फरार रहेकै अवस्थामा प्रहरीले उनलाई पक्राउ गरेको हो ।
