१९ कात्तिक, एजेन्सी ।
अमेरिकाले जलवायु परिवर्तन सम्बन्धी पेरिस सम्झौताबाट आफू बाहिरिने जानकारी संयुक्त राष्ट्रसंघलाई औपचारिक रुपमा गराएको छ ।
औपचारिक रुपमा जानकारी आएसँगै अमेरिका पेरिस सम्झौताबाट बाहिरिने प्रक्रिया सुरु हुने भएको छ । यो प्रक्रिया पूरा हुन एक वर्ष लाग्नेछ । विश्वका १८८ देशले जलवायु परिवर्तनको प्रभाव नियन्त्रणका लागि संयुक्त प्रयास गर्ने सहमति सन् २०१५ मा भएको पेरिस सम्झौतामा जनाएका थिए ।
अमेरिकी विदेश मन्त्री माइक पोम्पेओले सम्झौताले अमेरिकामाथि असमान आर्थिक भार थपेको आरोप लगाएका थिए । पेरिस सम्झौता अनुसार अमेरिकासहित विश्वका १८८ देश विश्वव्यापी तापमान वृद्धि २ डिग्री सेल्सियस कायम गर्ने र त्यसका लागि आवश्यक सबै पहल गर्नेमा सहमत भएका थिए ।
तर अमेरिकी राष्ट्रपति डोनाल्ड ट्रम्पले गएको वर्ष नै सो सम्झौताबाट अमेरिका बाहिरिने घोषणा गरेका थिए । त्यसको असर अति वास्तविक र भयानक रुपमा पर्ने प्रतिवेदन पनि सार्वजनिक भइसकेको छ ।
