४ मंसिर, एजेन्सी ।
६० भन्दा बढी देशका झण्डै २८ हजार बालबालिका सिरियाको उत्तर पूर्वी क्षेत्रमा फसेको संयुक्त राष्ट्रसंघले जनाएको छ ।
त्यहाँ रहेका विदेशी बालबालिका मध्ये आधा भन्दा बढी पाँच वर्षमुनिका रहेको संयुक्त राष्ट्रसंघका महासचिव एन्टोनिओ गुट्रेसका प्रवक्ता स्टेफान डुजारिकले बताएका छन् । ती बालबालिकाहरु शिविरहरुमा आश्रय लिएर बसिरहेको उनले बताएका छन् ।
उत्तर पूर्वी सिरियामा अलपत्र परेका विदेशी बालबालिका मध्ये झण्डै ८० प्रतिशत १२ वर्षभन्दा मुनिका रहेको युनिसेफको तथ्यांक उद्धृत गर्दै महासचिवका प्रवक्ता डुजारिकले बताएका छन् । यसरी फसेकामा अधिकांश इराकका बालबालिका छन् । झण्डै २० हजार इराकी बालबालिका रहेको जनाइएको छ ।
फसेका बालबालिकाहरु राज्यबिहीन बन्न सक्ने खतरा रहेको भन्दै संयुक्त राष्ट्रसंघले चिन्ता व्यक्त गरेको छ । बालबालिकाहरुलाई राज्यबिहीन हुन नदिनका लागि सम्बन्धित देशहरुले जिम्मेवारी लिनु पर्ने राष्ट्रसंघका महासचिवका प्रवक्त डुजारिकले बताएका छन् ।
बालबालिकाको हित र अन्तर्राष्ट्रिय गुणस्तरलाई ध्यानमा राखेर सम्बन्धित देशहरुले बालबालिकाहरुको सुरक्षा तथा आत्मसम्मानपूर्ण स्वदेश फिर्ती निश्चि गरिनु पर्नेमा उनले जोड दिएका छन् ।
सिरियाका शिविरहरुमा रहेका आफ्ना नागरिकहरुका सम्बन्धमा चाँडो भन्दा चाँडो अन्तर्राष्ट्रिय कानून अनुसार उपयुक्त निर्णय लिन सम्बन्धित सबै देशहरुसँग उनले आग्रह गरेका छन् ।
