२७ मंसिर, विराटनगर । आफ्नै अनुयायीमाथि बलात्कारको आरोप लागेका सिद्धबाबा भनिने कृष्णबहादुर गिरीलाई तेस्रो पटक म्याद थप गर्नका लागि आज अदालत उपस्थित गराईंदैछ ।
विराटनगरको विराट नर्सिङ होममा उपचाररत गिरीलाई तेस्रो पटक म्याद थपका लागि शुक्रबार जिल्ला अदालत सुनसरी लगिएको हो । उनलाई तेस्रो पटक म्याद थप गर्नका लागि जिल्ला प्रहरी कार्यालय सुनसरीले अस्पतालबाट अदालत लगेको हो ।
यसअघि सुनसरी अदालतले मंसिर २० गते बलात्कार मुद्धामा अनुसन्धानका लागि सात दिनको म्याद थप गरेको थियो । त्यसअघि पनि पुनः चार दिन म्याद थप गरेको थियो । म्याद थपपछि उनलाई उपचारका लागि पुनः अस्पतालमै राख्न अदालतले आदेश दिएको थियो ।
गिरीमाथि आरोप लगाएकी महिला अनुयायीले ४ कात्तिकमा आफुलाई बलात्कार गरेको भन्दै सिद्धबाबाविरुद्ध किटानी जाहेरी दिएपछि सुनसरी प्रहरीले उनलाई मंसिर १६ गते बिहान अस्पतालबाटै पक्राउ गरेको थियो ।
उनी छाती, मुटु तथा प्रोस्टेट तथा मिर्गौलाको पत्थरीको उपचारका लागि विराट नर्सिङ होममा भर्ना भएका थिए । १० दिनसम्म बिनाअक्सिजन समाधिमा बसेर आफूलाई सिद्ध पुरुष घोषणा गरेका कृष्णदास अहिले अक्सिजनका साथमा उपचार गराईरहेका छन् ।
