विराटनगर, फागुन २४
नारीदिवसको अवसर पारेर सामाजिक विकासमन्त्री जीवन घिमिरेले १ नं प्रदेश भरिका दृष्टिविहीन विद्यार्थीहरुलाई मोवाइल वितरण गरेका छन् ।
मोरङ नेत्रहीन संघ, बेलबारीले आफ्नै सभाहलमा आयोजना गरेको कार्यक्रममा प्रदेशभरिका विभिन्न ५५ जना नेत्रहीन विद्यार्थीहरुलाई उनीहरुको पढाइ क्षमता अभिवृद्धिका लागि प्रावोधिकरण र एन्ड्रोइड मोवाइल वितरण गरिएको हो ।
मोवाईल वितरण कार्यक्रमलाई संवोधन गर्दै सामाजिक विकास मन्त्री घिमेरेले अपाङ्गता भएकाहरुको पनि समाज विकासमा ठूलो हात रहेको र उनीहरुले आत्मसंम्मानका साथ वाँच्न पाउनु पर्नमा जोड दिए ।
मन्त्री घिमिरेले प्रविधिले उनीहरुलाई आफ्नो जिवनस्तर उकास्नमा ठूलो सहगोग पुग्ने आशा समेत व्यक्त गरे । कार्यक्रममा राष्ट्रिय अपाङ्ग महासंघका पूर्व अध्यक्ष एवम् अपाङ्गता अधिकार र विकासका लागि क्रियाशील नेपालका अध्यक्ष वीरेन्द्रराज पोख्रेलले आफू संधै अपाङ्गताहरुको हकहितमा लागिरहेको र वितरण गरिएका मोवाइलले दृष्टिविहिन विद्यार्थीहरुको पढाईमा ठूलो सहयोग पुर्याउने बताए ।
सोही अवसरमा प्रदेश स्तरीय दृष्टिहिन महिला क्रिकेट खेलाडीहरुलाई पनि नगद र प्रमाणपत्रले सम्मान गरिएको थियो ।
