५ पुस,विराटनगर ।
आरोहण गुरुकुल विराटनगरले सुरु गरेको काव्यारोहण, आरोहण कविता यात्राको दोस्रो अनुक्रममा शनिबार वरिष्ठ कवि तुलसी दिवस प्रस्तुत भएका छन् । हाटखोलास्थित सुशीला कोइराला नाटकघरमा भएको उक्त एकल कविता वाचन कार्यक्रममा कवि दिवसले आफ्ना करिब दर्जन वटा कविता वाचन गरेका छन् ।
उनले रुख, बाघचाल, रंगिन आवाजहरुको जुलुस, अवतार दर्शन, रातो फूल, जिन्दगी लुगा भए लगायत कविता वाचन गरे । कार्यक्रम हेर्न विराटनगर सहित दमक, धरान, इटहरीबाट साहित्यकार, विद्यार्थी, वुद्धिजिवी लगायत उपस्थित भएका थिए ।
हरेक महिनाको पहिलो शनिबार आयोजना हुने काव्यारोहण, आरोहण कविता यात्रामा यसअघि आयामेली कवि बैरागी काइँला प्रस्तुत भएका थिए । अग्रजहरुको सम्मानस्वरुप वरिष्ठ कविलाई हरेक महिना उपस्थित गराइने कार्यक्रम संयोजक धीरज राईले बताए ।
