७ पुस, खोटाङ ।
खोटाङको जन्तेढुङ्गा गाउँपालिकास्थित प्रहरी चौकी देविस्थानका लागि नवनिर्मित कार्यालय, ब्यारेक, मेश र शौचालय भवनहरुको निमार्ण सम्पन्न भएको छ । भवनको १ नम्बर प्रदेश प्रहरी प्रमुख प्रहरी नायव महानिरीक्षक ठाकुरप्रसाद ज्ञवालीले उद्घाटन गरेका छन् । भवनहरुको आइतबार आयोजित एक कार्यक्रमबीच उद्घाटन गरिएको हो ।
उद्घाटन कार्यक्रममा ज्ञवालीले एक भएर भवन बनाउन जुटेजस्तै शान्ति सुरक्षा कायम गर्नको लागि पनि स्थनीयवासीले उत्तिकै सहयोग गर्नुपर्ने बताए । अपराध नियन्त्रण गर्ने दायित्व प्रहरी र स्थानीयको रहेको भन्दै उनले यस्तो कार्यमा मिलेर अघि बढ्न नसके राम्रो भवनको औचित्य नै नरहने बताए । समुदाय प्रहरी साझेदारी कार्यक्रमद्धारा समाजमा हुने विभिन्न किसिमका अवाञ्छनीय क्रियाकलापहरुलाई रोक्न नेपाल प्रहरीले गाउँ वस्तीहरुमा विभिन्न जनचेतना मुलक कार्यक्रमहरु गर्दै आईरहेको बताउदै उनले सानो र ठूला दुबै घटनाहरुको बारेमा प्रहरीलाई सूचना दिन कसैलाई पनि नहिच्किचाउन उनले आग्रह गरे ।
कार्यक्रमा निमित्त प्रमुख जिल्ला अधिकारी श्याम राई, गाउँपालिकाकी उप प्रमुख विमला राई, जन्तेढुंगा गाउँपालिकाका अध्यक्ष शंकर राई लगायतले शुभकामना व्यक्त गरेका थिए । कार्यक्रममा प्राविधिक प्रहरी निरीक्षक ईन्जिनियर केबिनजंग थापाले भवन निर्माण सम्बन्धी प्रतिवेदन प्रस्तुत गरेका थिए ।
राष्ट्रिय पुनः निर्माण प्राधिकरण कोषको १ करोड ७८ लाख १५ हजारको लागतमा साढे दुई तले पक्कि भवनको निर्माण भएको हो । कार्यक्रममा जिल्ला प्रहरी कार्यालय उदयपुरका प्रहरी उपरिक्षक वीरबहादुर बुढा, सबै सरोकारवाला निकायहरु, नागरिक समाज, राजनीतिक दलका प्रतिनिधिहरु, संचारकर्र्मी लगायत स्थानीय समाजसेवीहरुको उपस्थिति रहेको थियो ।
