९ माघ, एजेन्सी । चीनको वुहान शहरमा अधिकारीहरुले स्थानीय मानिसहरुलाई यात्रा गर्न प्रतिबन्ध लगाएका छन् । कोरोना भाइरसको प्रकोपलाई रोक्नको लागि अधिकारीहरुले यस्तो प्रतिबन्ध लगाएका हुन् ।
वुहान शहरबाट नै कोरोना भाइरस फैलिन सुरु भएकोे थियो । यो भाइरसबाट अहिलेसम्म कम्तीमा १७ जनाले ज्यान गइसकेका छन् भने चीनमा पाँच सय ५० भन्दा बढी सङ्क्रमित भएका छन् । बिहीबार बिहानबाट लगाइएको यो प्रतिबन्धपछि शहरी बस, ट्रेन, सबवे, विमानस्थल बन्द गरिएका छन् ।
वुहान शहर पूर्णरुपमा बन्द गरिएको छ भने होटल र रेस्टुरेन्टलाई ठूला कार्यक्रमको आयोजना नगर्न तथा पुस्तकालय, सङ्ग्रहालय र नाटकघरलाई प्रदर्शनीको आयोजना नगर्न अधिकारीहरुले सचेत गराएका छन् । स्थानीयहरुलाई अत्यावश्यक काममा मात्र बाहिर निस्कन भनिएको छ । यसका साथै शहरका नगरपालिका सरकारले सूचना जारी गर्दै सार्वजनिक स्थानमा सबैलाई मास्क लगाउन सचेत गराएको छ ।
अहिलेसम्म चीनबाहेक अमेरिका, दक्षिण कोरिया, जापान र थाइल्याण्डमा पनि कोरोना भाइरसको सङ्क्रमण देखिएको छ । यो भाइरस मानिसबाट मानिसमा सर्न सक्ने चिकित्सकहरुले बताएका छन् ।
’सि फुड’ पाइने बजारबाट यो भाइरस मानिसमा सरेको भनिए पनि यसबारे वैज्ञानिकले अनुसन्धान गरिरहेका छन् । कोरोनाभाइरसका कारण सामान्यतया सङ्क्रमित व्यक्तिहरुमा रुघा, खोकीको लक्षण देखिन्छ र यसको असर गम्भीर हुँदै जाँदा ज्यान पनि जान सक्छ ।
