२१ माघ, काठमाडौं । कोरोना भाइरसका कारण चीनबाट आउने पर्यटक घट्ने भएपछि नेपालले वैकल्पिक बजार खोज्ने भएको छ ।
काठमाडौंमा भएको पत्रकार सम्मेलनना होटल एसोसिएशन अफ् नेपाल (हान) की अध्यक्ष सिर्जना राणाले चीनले कोरोना भाइरस फैलन नदिन सतर्कता अपनाएकाले नेपाल आउने पर्यटक कम आउने देखिएकोले अर्को बजार खोज्ने बताएकी हुन् ।
नेपालको दोस्रो ठूलो पर्यटक बजार रहेको चीन भाइरसबाट प्रभावित भएकाले मध्य–पूर्व, दक्षिण–पूर्वी एसिया र खाडीका पर्यटक तान्न पहल गर्ने राणाले बताइन् । नेपालमा भाइरसको सङ्क्रमण नभएको र यहाँ भएका हल्लालाई कम गर्दै पर्यटक ल्याउनुपर्ने उनको भनाइ छ ।
उनले नेपालको पर्यटन क्षेत्रले पहिले पनि यस्ता समस्या भोगेको र समाधान गरेकाले अहिले पनि समाधान हुने बताइन् । कार्यक्रममा नेपाल भ्रमण वर्षका लागि राष्ट्रिय कार्यक्रम संयोजक सुरज वैद्यले भ्रमण वर्षको सुरुमै फैलिएको प्रकोपले भ्रमण वर्षको लक्ष्यमा समस्या पर्न सक्ने बताए । भाइरसले विश्वभर प्रभाव देखिएकाले अबको तीन महिना नेपाल पर्ख र हेरको अवस्थामा बस्ने र त्यसपछि कदम चाल्ने बताए ।
वैद्यले वैकल्पिक गन्तव्यको पनि खोजी भैरहेको बताएका छन् । भाइरसको कारण होटलले ठूलो मार बेहोरेको भन्दै उनले यसविरुद्ध सबैक्षेत्र एक भएर अघि बढ्नुपर्ने बताए ।
होटल एसोसियशन अफ् नेपालका उपाध्यक्ष विनायक शाहले नेपालमा कोरोनाबारे धेरै हल्ला भएकोप्रति असन्तुष्टि व्यक्त गर्दै सङ्क्रमणको हल्ला नफैलाउन आग्रह गरेका छन् ।
हान र भ्रमण वर्षको सचिवालयले चीनमा भएको प्रकोपप्रति दुःख व्यक्त गर्दै भाइरस अन्त फैलन नदिन अपनाएको सतर्कता स्वागतयोग्य रहेको पनि बताएका छन् ।
