२२ माघ, काठमाडौँ ।
संस्कृति, पर्यटन तथा नागरिक उड्डयनमन्त्री योगेश भट्टराईले पर्यटन प्रवद्र्धनका लागि प्रयाप्त स्रोत र जनशक्ति नभएको बताएका छन् । प्रतिनिधिसभाको अन्तर्राष्ट्रिय सम्बन्ध समितिमा भएको भ्रमण वर्ष २०२० को कार्यान्वयनको अवस्था विषयक छलफलमा मन्त्री भट्टराईले स्रोत, साधन र जनशक्ति अभाव रहेको बताएका हुन् ।
भ्रमण वर्ष र पर्यटन प्रवद्र्धनका लागि जनशक्ति र स्रोत, साधन मात्रै नभएर बजेट पनि न्यून रहेको उनले बताए । ‘भ्रमण वर्ष र पर्यटन प्रवद्र्धनका लागि स्रोतहरुको अभाव छ । हामी २०, २५ करोडको कुरा गरिरहेका छाँै । यो अन्त्यन्तै न्यून बजेट हो’, उनले भने । मन्त्री भट्टराईले नेपालको पर्यटन प्रवद्र्धन र भ्रमणवर्षलाई प्रभावकारी बनाउन जनशक्ति थप्दै स्रोत साधन बढाउने कुरामा जोड दिने प्रतिवद्धता समेत जनाएका छन् ।
मन्त्री भट्टराईले नारायणहिटीमा कुनै होटल नबन्ने स्पष्ट पारेका छन् । संग्राहलयको मापदण्डमा नारायणहिटी रहने उल्लेख गर्दै भट्टराईले भने े, ‘नारायणहिटी दरबारमा कुनै पनि होटल बन्दैन यो संग्राहलयकै रुपमा रहनेछ । संग्राहलयको मापदण्डभित्र रहनेछ । होटल बनाउने योजना पनि छैन् । बन्दा पनि बन्दैन् । बरु कफि सपसम्म बन्न सक्छ । अरु कुनै व्यापारिक प्रयोजनका लागि संरचना बन्दैन् ।’
उनले कारोना भाइरसका कारण चीनबाट लक्ष्यअनुसार पर्यटक भित्र्याउन सम्भव नहुने भएकाले अन्य बैकल्पिक बजारको खोजी भएको बताए । चीनबाट यो वर्ष ५ लाख पर्यटक भित्र्याउने लक्ष्यका साथ काम भएपनि कोरोना भाइरसले पूर्ति हुने सम्भावना नरहेको र नीजि क्षेत्रहरुसँग छलफल गरी बैकल्पिक बजार खोज्न योजना बनिरहेको उनले बताए ।
बैठकमा मन्त्री भट्टराईले त्रिभुवन अन्तर्राष्ट्रिय विमानस्थल पहिले भन्दा धेरै सुधार आएको बताएका छन् । तराई क्षेत्रमा रहेका राजविराज विमास्थल बाहेक अन्य विमानस्थलहरुमा रात्रिकालिन उडान सुरु भएको बताए । उनले पोखरा अन्तर्राष्ट्रिय विमास्थल र गौतमबुद्ध अन्तर्राष्ट्रिय विमानस्थलको पछिल्लो कार्यप्रगति राम्रो रहेको बताए ।
