२८ माघ, काठमाडौं । रुस्लान थ्री स्टार क्लब न्यूरोड टिम (एनआरटी)माथि जित हासिल गर्दै कतार एयरवेज सहिद स्मारक ए डिभिजन लिगको तेस्रो स्थानमा उक्लेको छ । थ्री स्टारले एनआरटीलाई १–० ले हराएको थियो ।
परिवर्तित खेलाडी दिपेश घलेले खेलको अन्त्यतिर गरेको गोल नै निर्णायक बनेको थियो । मिक्छेन तामाङको पासमा दिपेशले पेनाल्टी बक्स भित्रबाट गरेको प्रहार रोक्न एनआरटीका गोलकिपर अजित प्रजापतिले कुनै मौका पाएनन् ।
१२ औं चरणको खेलमा सातौं जित निकाल्दै थ्री स्टार २३ अंकका साथ तेस्रो स्थानमा उक्लेको हो । उपाधि दौडबाट बाहिरिएको नेपाल आयल निगम मनाङ मस्याङ्दीको २२ अंक छ र टोली चौथो स्थानमा झरेको छ । बाँकी दुई खेलमा जित हिसिल गर्दा भने अब मनाङले उपाधि जित्ने छैन ।
थ्री स्टार यसअघि नै उपाधि दौडबाट बाहिरिएको थियो । ब्रिगेड ब्वाइज क्लब (बिबिसी) लाई आजै त्रिभुवन आर्मी क्लबले ३–० ले हराउँदै पुनः शीर्षस्थानमा उक्लेपछि मनाङको उपाधि सम्भावना समाप्त भएको हो ।
आर्मीको २९ अंक पुगेको छ भने दोस्रो स्थानको सानमिगेल मछिन्द्र क्लबको २८ अंक छ । आर्मी र मछिन्द्रबीच शनिबार हुने खेल उपाधिको छिनोफानो गर्नेछ ।
कम्तीमा लिग नयाँ च्याम्पियन पाउने निश्चित भएको छ । सातदोबाटोस्थित एन्फा कम्प्लेक्स्मा मंगलबारभ एको खेलको सुरुमै एनआरटीले अग्रताको मौका पाएको थियो ।
चौथो मिनेटमा जोर्डन ओओनाको प्रहारलाई थ्री स्टारका गोलरक्षक प्रिसोले डाइभिङ दिदै नियन्त्रणमा लिए ।
