८ फागुन, काठमाडौँ ।
नेपालस्थित स्वीजरल्याण्ड दूताबासले सञ्चार तथा सूचनाप्रविधि मन्त्री गोकुलप्रसाद बाँस्कोटासँग सम्बन्धित समाचारप्रति आफ्नो ध्यानाकर्षण भएको जनाएको छ । दुतावासले बिहीबार विज्ञप्ति जारी गर्दै सो सम्बन्धी कुनै पनि छलफलमा दूताबासको संलग्नता नरहेको प्रष्ट पारेको हो ।
दूताबासले घटनालाई जोडेर समाचारमा आएका व्यक्तिसँग दूताबासको कुनै सम्बन्ध नरहेको र सो व्यक्ति स्वीस कम्पनीको स्थानीय एजेन्ट नरहेको उल्लेख गरेको छ । दुताबासले यस्तो कुनै छलफल नभएको र भविष्यमा पनि नहुने जनाएको छ।
बुधबार सञ्चारमन्त्री गोकुल प्रसाद बाँस्कोटा र स्वीस एजेन्ट मानिएका विजयप्रकाश मिश्र सेक्युरिटी प्रिन्टिङ प्रेस खरिद प्रकरणमा कमिशनका लागि सेटिङ गर्न कुराकानी गरेको अडियो रेकर्ड बाहिरिएको थियो । उक्त विवादमा तानिएपछि मन्त्री बाँस्कोटोले बिहीबार नै प्रधानमन्त्रीलाई राजीनामा बुझाईसकेका छन् ।
