२६ फागुन, काठमाडौँ । दैनिक उपभोग्य बस्तु, खाद्यान्न, ग्यास, माक्स, औषधिलगायत अत्यावश्यक साम्रगीको अभाव र कालोबजारी नियन्त्रण गर्न नेपाल तरुण दलले सरकारको ध्यानाकर्षण गराएको छ ।
अध्यक्ष जितजंग बस्नेतले सोमबार विज्ञप्ति जारी गर्दै कालोबजारी र कृतिम अभावको निगरानी गर्न तरुण दलका नेता कार्यकर्तालाई निर्देशनसमेत दिएका छन् ।
बस्नेतले कोरोना भाइरसको त्रास देखाएर कालोबजारी गर्नेहरुले कृतिम अभाव सृजना गरेको उल्लेख गरेका छन् । चीनबाट शुरु भएर विश्वका विभिन्न मुलुकमा माहामारीका रुपमा फैलिरहेको कोरोना भाइरसको सम्भावित जोखिमलाई मध्यनजर गरी सजग रहन विज्ञप्तिमा आह्वान गरिएको छ ।
विज्ञप्तिमा एक अर्कासँग भेट हुँदा, हात नमिलाउन र नमस्कार भनेर सम्बोधन गर्न आग्रह गर्दै बस्नेतले विद्यालय विश्वविद्यालय जस्ता समूहमा बसेर अध्ययन अध्यापन हुने ठाउँमा विशेष सावधानी अपनाउन अनुरोध गरेका छन् ।
अध्यक्ष बस्नेतले कोरोना भाइरसबारे आम मानिसमा देखिएको त्रासलाई न्यूनीकरण गर्न, सम्बन्धित निकायबाट जारी गरेका आधिकारिक धारणा जानकारी गराएर समाजमा सचेतना फैलाउन सबैलाई आग्रह गरेका छन् ।
