१२ चैत्र, दाङ ।
प्रदेश ५ सरकारले दाङको बेलझुन्डीमा सञ्चालन गरेको कोरोना विशेष अस्पताल आजदेखि सञ्चालनमा आएको छ ।
एक सय बेड क्षमताको बनाउने गरी आज ३० बेडबाट उपचार सुरु गरिएको प्रदेश ५ का आन्तरिक मामिला तथा कानुनमन्त्री कुलप्रसाद केसीले बाह्रखरीलाई जानकारी दिए ।
कोरोना आशंका गरिएका तथा संक्रमितलाई यहाँको आइसोलेसनमा राखेर स्वाब परीक्षणका लागि काठमाडौं पठाउने गरी अस्पताल स्थापना गरिएको हो । आजदेखि नै कोरोनाको आशंका गरिएकालाई राख्न सुरु गरिएको अस्पतालले जनाएको छ ।
आयुर्वेद शिक्षण अस्पताललाई कोरोना विशेष अस्पतालका रुपमा स्थापना गरिएको हो । यस अस्पतालमा प्रदेश सरकारले जनशक्तिको व्यवस्थापन गरेको जनाएको छ ।
आयुर्वेद शिक्षण अस्पतालमा रहेका बेडहरु यथावत राखी अन्य बेड थपेर प्रदेश स्तरको कोरोना अस्पताल निर्माण गरिएको हो । प्रदेश ५ सरकारले यसअघि रुपन्देही र बाँकेमा तीनवटा कोरोना विशेष अस्पताल सञ्चालन गरिसकेको छ ।
बेलझुन्डीमा स्थापना गरिएको अस्पतालमा काम गर्ने चिकित्सकसहितको टिमलाई शतप्रतिशत भत्ताको व्यवस्था गरिएको आन्तरिक मामिला तथा कानुनमन्त्री केसीले बताए ।
मन्त्री केसीले अहिलेसम्म प्रदेश ५ मा ३७ जनामा कोरोनाको परीक्षण गरिएकामा सबै नेगेटिभ भेटिएको पनि जानकारी दिए । योसँगै प्रदेश सरकारले प्रदेश ५ मा चारवटा कोरोना विशेष अस्पताल सञ्चालनमा ल्याएको हो ।
