३० चैत, काठमाडौँ । विश्वभर महामारीका रुपमा फैलिरहेको कोभिड–१९(कोरोना भाइरस)का कारण विदेशमा रहेका १४ नेपाली नागरिकको ज्यान गुमाएका छन् ।
गैरआवासीय नेपाली सङ्घ (एनआरएनए)ले सङ्कलन गरेको तथ्याङ्क अनुसार कोरोना सङ्क्रमणबाट अमेरिकामा पाँच, युएईमा एक र बेलायतमा ८ जना नेपालीको ज्यान गएको छ ।
सङ्घका अध्यक्ष कुमार पन्तको अध्यक्षतामा गठित उच्चस्तरीय समितिअन्तर्गतको स्वास्थ्य समितिले सो तथ्याङ्क सार्वजनिक गरेको हो । समितिका संयोजक डा सञ्जीव सापकोटाका अनुसार हालसम्म विभिन्न मुलुकमा रहेका ६ सय ६५ जना गैरआवासीय नेपालीमा कोरोना सङ्क्रमण भएको पुष्टि भइसकेको छ ।
विदेशस्थित नेपाली नियोग, गैरआवासीय नेपाली सङ्घको शाखा तथा स्थानीय सङ्घसंस्थाद्वारा सङ्कलित सूचनाका आधारमा उक्त तथ्याङ्क सार्वजनिक गरिएको उनले जानकारी दिए ।
अमेरिकामा ५००, बेलायतमा १००, स्पेनमा १८, युएईमा १०, जर्मनीमा चार, पोर्चुगलमा आठ, अष्ट्रेलियामा नौ, साउदी अरेबियामा चार, कुवेतमा पाँच, जापान, म्यानमार, मलेसिया र हङकङमा एक/एक जना नेपालीमा कोरोना सङ्क्रमण पुष्टि भएको कोरोना एनआरएनए उच्चस्तरीय समितिले जनाएको छ ।
