१ वैशाख, एजेन्सी ।
संयुक्त राष्ट्रसंघको जैविक विविधता प्रमुख एलिजावेथ मरुमा म्रेमाले विश्वव्यापी महामारी रोकथामका लागि जंगली जनवारको बिक्रिवितरणमा प्रतिबन्ध लगाउन आग्रह गरेकी छन् । उनले भनिन्, जंगली जनावरको किनबेचका कारण मानव स्वास्थ्यमा त्रास उत्पन्न भएको छ ।
विशेष गरी लोपन्मुख जनावरको किनबेचका कारण यस्तो समस्या उत्पन्न भएको छ । हामीलाई थाहा छ कि विगत ६० वर्षयता मानवीय गतिविधिका कारण अधिकांश जुनोटिक डिजिज् (जनावरबाट हुने रोगहरु) को संक्रमण बढेको छ ।
जंगली जनावर र मानवबीचको सम्बन्ध नजिकिँदै जाँदा यस्ता रोगको संक्रमणको दर उच्च देखिन्छ, म्रेमाले थपिन् । त्यसकारण मासुजन्य बजार नियमन गर्नुका साथै, सरसफाइमा ध्यान दिन र जंगली जनावरको अवैधानिक व्यापारलाई बन्द गर्नुपर्ने उनको सुझाव छ ।
उनले केही ग्रामिण समुदाय जंगली जनावरको व्यापारमा निर्भर भएको उल्लेख गर्दै आर्थिक र खाद्य सुरक्षाको प्रत्याभूति गर्न आवश्यक रहेकोतर्फ जोड दिइन् ।
चीनले जंगली जनावरको व्यापारमा अस्थाइ प्रतिबन्ध लगाएको छ । वुहानको सी–फुड मार्केटबाट नोभेल कोरोना भाइरसको संक्रमण भएको हुनसक्ने बताइएको छ । तर, यहीबाट उत्पत्ती भएको भन्ने यथेष्ट प्रमाण भेटिएर पुष्टि भइसकेको छैन ।(बीबीसी)
