१२ बैशाख, एजेन्सी । अमेरिकी संसदले कोरोना भाइरस राहत प्याकेज पारित गरेको छ । कोरोना भाइरसको महामारी बढ्दै गएपछि त्यसबाट प्रभावितहरुलाई आर्थिक सहायताका लागि कोष स्थापना गरिएको हो ।
पाँच खर्ब अमेरिकी डलर बराबरको कोरोना भाइरस सहायता कोष स्थापना गर्ने विधेयक संसदबाट पारित भएको हो । सरकारले कोरोना भाइरसको संक्रमणका कारण प्रभावित बनेका साना व्यवसाय र अस्पतालहरुलाई सहायता प्रदान गर्ने बताइएको छ ।
अमेरिकी तल्लो सदनकी सभापति न्यान्सी पेलोसीले सरकारले संसदमा पेश गरेको सहायता कोष सम्बन्धी विद्येयक पारित भएको बताएकी हुन् ।
यता कोरोनाको महामारीबाट प्रभावित भएकाले अमेरिकामा बेरोजगार भत्ता लिनका लागि आवेदन दिनेको संख्या दोब्बर भएको बताइएको छ । पछिल्ला दिनहरुमा कोरोनाका कारण बेरोजगारी बढ्दै गएपछि सरकारले दिने सहायता लिनका लागि आवेदन दिनेको संख्या २ करोड ६४ लाख पुगेको समाचारमा जनाइएको छ ।
यसैबीच विश्व्यापी रुपमा फैलिएको कोरोनाबाट करिब २७ लाख १८ हजार बढी संक्रमित भएका छन् । कोरोनाका कारण विश्वभर एक लाख ९० हजार भन्दा बढीको मृत्यु भएको छ भने करिब ७ लाख ४५ हजार बढप् उपचारपछि घर फर्किएको अन्तर्रा्ष्ट्रिय समाचार संस्थाहरुले जनाएका छन् । अमेरिकामा मात्र ४९ हजार ८ सय भन्दा बढी मानिसको मृत्यु भइसकेको छ ।
