२४ बैशाख, काठमाडौं । नेकपा सचिवालय बैठक आज बस्दै छ । भोली बस्ने स्थायी कमिटी बैठकका एजेण्डालाई अन्तिम रुपमा दिन आज सचिवालय बैठक बस्न लागेको हो ।
गत शनिबार बसेको सचिवालय बैठकले अध्यक्ष पुष्पकमल दाहाललाई स्थायी कमिटी बैठकका एजेण्डा तय गर्ने जिम्मा दिएको थियो ।
सोमबार र मङ्लबार भएका छलफलमा बैठकका एजेण्डाबारे दुई अध्यक्षबीच सहमति नभएपछि दाहाल र अर्का नेता माधवकुमार नेपाल पक्षका स्थायी कमिटी सदस्यहरुले छुट्टै भेलासमेत गरेका छन् ।
भेलाले विहिबार बस्ने स्थायी कमिटी बैठकमा एक ढिक्का भएर प्रस्तुत हुने रणनीति बनाएको छ । आफूहरुले पत्र लेखेर बोलाएको बैठकमा सबै विषयमा खुलेर छलफल हुनुपर्ने अडानमा रहेको भेलामा सहभागी नेताहरुले बताएका छन् ।
असन्तुष्ट पक्षले सरकारले गरेका विवादित कामबारे उठेको मुद्दामा प्रधानमन्त्री ओलीमाथि कयौं प्रश्नको जवाफ खोज्ने रणनीति तय गरेको छ ।
विवादास्पद दुई अध्यादेश प्रकरणपछि पार्टी विभाजनको खतरा रहेको भन्दै २० जना स्थायी कमिटी सदस्यले पत्र लेखेर स्थायी कमिटी बैठकको माग गरेका थिए ।
अध्यक्ष दाहाल र नेता नेपाल पक्षका ती नेताले स्थायी कमिटी बैठक बोलाउन माग गर्दै यही वैशाख १० इमेलमार्फत अध्यक्ष ओलीलाई पत्राचार गरेका थिए ।
