२८ बैशाख, एजेन्सी । विश्वव्यापी कोरोना भाइरस महामारीबाट ४१ लाख भन्दा बढी संक्रमित भएका छन् ।
अमेरिकास्थित जोन हप्किन्स विश्वविद्यालयका अनुसार मृतकको संख्या पनि बढ्दै गएको छ । हालसम्म विश्वभर करिब ४१ लाख बढी मानिस कोरोनाबाट संक्रमित भएका छन् भने २ लाख ८० हजार भन्दा बढीको मृत्यु भइसकेको छ ।
विश्वभर कोरोना संक्रमणको उपचारपछि १४ लाख भन्दा बढी मानिस घर फर्किएका छन् । सबैभन्दा बढी अमेरिकामा संक्रमित भएका छन् ।
१३ लाख भन्दा बढी संक्रमित हुँदा अमेरिकामा ८० हजार भन्दा बढीको मृत्यु भएको छ ।
पछिल्लो २४ घण्टामा मात्र मृतकको संख्या १४ सय भन्दा बढी रहेको अन्तर्रा्ष्ट्रिय समाचार संस्थाहरुले जनाएका छन् । त्यसैगरी बेलायतमा ३१ हजार भन्दा बढीको मृत्यु भएको छ । गत २४ घण्टामा बेलायतमा ३ सय ५० जनाको मृत्यु भएको छ ।
इटालीमा हालसम्म ३० हजार भन्दा बढीको मृत्यु हुँदा स्पेनमा २६ हजार बढीको मृत्यु भएको छ । स्पेनलगायत केही देशमा मृतकको संख्या केही घट्दै गएको बताइएको छ ।
यसैबीच अमेरिकाका पूर्व राष्ट्रपति बाराक ओबामाले ट्रम्प प्रशासनको आलोचना गरेका छन् । कोरोनाको संक्रमण फैलिने क्रम नरोकिएपनि त्यसलाई नियन्त्रण गर्न सरकारले प्रभावकारी कदम नचालेको ओबामाको आरोप छ । उनले सरकारले लकडाउन नगर्दा संक्रमण फैलनु दुखद भएको टिप्पणी गरेका छन् ।
यता चीनका राष्ट्रपति सी चिनफिङले उत्तर कोरियामा कोरोनाको संक्रमण फैलनसक्ने भन्दै चिन्ता व्यक्त गरेका छन् । उनले उत्तर कोरियालाई स्वास्थ्य सामग्री सहयोग गर्न चाहेको पनि बताएका छन् ।
