५ जेष्ठ, काठमाडौं ।
प्रतिनिधिसभाका सांसदहरुले सरकारले ल्याएको नीति तथा कार्यक्रममाथि मिश्रित प्रतिक्रिया दिएका छन् ।
सोमबार नीति तथा कार्यक्रमको छलफलमाथि भागलिँदै प्रतिपक्षी दलका सांसदहरुले जन अपेक्षाअनुसार नीति तथा कार्यक्रम नआएको बताएका छन् । समाजवादी पार्टीकी सांसद रेणु कुमारी यादवले कोरोनाबाट ज्यान गुमाएकी महिलाको शव सरकारले उठाउन नसकेको भन्दै आलोचना गरिन् ।
नीति तथा कार्यक्रममाथिको छलफलमा आफ्नो धारणा राख्दै उनले नेताहरुले ठूला कुरा गरेपनि कोरोना महामारीको संकटसँग जुट्ने हिम्मत नगरेको बताइन् । उनले भनिन, ‘‘कोरोनाबाट मृत्यु भएकी महिलाको लास उठाउन पनि सरकारले हिम्मत देखाएन् । स्वयमसेवकले लास उठाएर पशुपति घाँटमा पु¥याए ।
यहाँ ठूल्ठूलो कुरा गरिरहेका छन् । हाम्रो सरकारले सारा तयारी गरेको छ भनिरहेका छन् । अहिले मधेशमा क्वारेन्टाइन छैन् । मरेपछि कोरोना पुष्टि हुने एकमात्र देश नेपालहो । विश्वको इतिहासमा एक नम्बर नेपालहो ।’’ प्रतिपक्षीदल कांग्रेसका सांसद प्रकाशमान सिंहले राष्ट्रिय सुरक्षाका लागि खटिनुपर्ने नेपाली सेना सडकमा खटिएर जनतालाई अपमानित गरिरहेको बताए ।
उनले भने, ‘‘सरकारले के गर्न खोजेको ? राष्ट्रिय सुरक्षामा लगाउनुपर्ने सेनालाई किन? शान्ति सुरक्षामा त प्रहरीलाई लगाउनुपर्ने हो नि । किन यस्तो भइरहेको छ । जनतलाई किन अपमानित गरिरहेको छ । सरकारको नियत के हो ?भन्ने कुराबाट हामी सजग हुनुपर्छ ।’’
सुगौली सन्धीअनुसार सम्पूर्ण भूमि समेटेर नेपालको नयाँ नक्सा छिटो जारी गर्नुपर्ने उनले बताए । नेपाली कांग्रेसका सांसद ज्ञानेन्द्र बहादुर कार्कीले एमसीसीलाई सत्तारुढ दलले आफ्नो आन्तरिक विवादको विषय बनाएको बताए । आन्तरिक विवादको विषय नबनाएर यसलाई संसदमा पेश गरी थहन छलफल गर्नुपर्ने उनले बताए ।
उनले अबको बजेट रोग र भोकबाट जनतलाई जोगाउनमा केन्द्रीत हुनुपर्ने बताए । उनले मजदुर, श्रमिक र विपन्न किसानहरुलाई एक महिनाको ५ हजारका दरले तीन महिनासम्मको १५ हजार रुपैयाँ दिनुपर्ने बताए । छिटो प्रतिफल दिनेगरी योजनाहरु सम्पन्न गर्न सरकारको ध्यान केन्द्रीत हुनुपर्ने उल्लेख गर्दै उनले लिम्पियाधुरा, लिपुलेक र कालापानीको समस्या कुटनीति पहलबाट समामाधान गर्नुपर्ने र सो कुरा संसदमा जानकारी गराउनुपर्ने उनले बताए ।
राष्ट्रिय जनता पार्टी राजापाका सांसद शरदसिंह भण्डारीले महामारी रोकथाम भन्दापनि नयाँ रेकर्ड कायम गर्ने भूत सरकारमा सवार भएको बताए । नीति तथा कार्यक्रममा महामारी रोकथाम, नियन्त्रण र यसबाट प्रभावित क्षेत्रहरुका विषयमा आउनुपर्ने भएपनि त्यसो हुन नसकेको उनले बताए ।
सत्तारुढ नेपाल कम्युनिष्ट पार्टी नेकपाका सांसद शेरबहादुर तामाङले गाँजा खेतीलाई कृषिसँग जोड्न सके आर्थिक उपार्जनको बाटो खुलाहुने बताए । स्वास्थ्यलाई पहिलो प्राथमिकतामा राख्दै कृषिलाई दोस्रो प्राथमिकतामा राख्नुपर्ने बताए ।
