२१ जेष्ठ, काठमाडौं ।
प्रमुख प्रतिपक्षी नेपाली कांग्रेसले करसम्बन्धी ताकेता फिर्ता लिएर समयावधि थप गर्न सरकारलाई सुझाव दिएको छ ।
कांग्रेसले बुधबार विज्ञप्ति जारी गरेर सरकारलाई करसम्बन्धी ताकेता फिर्ता लिएर समयावधि थप गर्न सरकारलाई सुझाव दिएको हो । “जेठ २५ भित्र विभिन्न कर तिर्नुपर्ने ताकेताको भद्र अवज्ञाको विकल्प छैन । ताकेता फिर्ता लेऊ, समयावधि थप गर सरकार,” सभापति शेरबहादुर देउवाद्वारा जारी विज्ञप्तिमा भनिएको छ ।
उनले सरकारलाई वर्तमान समयप्रति गम्भीर बन्न माग गर्दै लकडाउनले मुलुकको समग्र क्षेत्रमा परेको असरको समग्र मूल्यांकन गरेर काम गर्न पनि अपिल गरेका छन् । “जेठ २५ भित्र कर तिर्न निर्धारित समयावधिको ताकेता तत्काल फिर्ता गरेर स्थिति मूल्यांकन साथ संवादमार्फत समयावधि थप गर्न सरकारसमक्ष माग गर्दछु,” देउवाले भनेका छन् ।
कोरोनाका कारण नागरिकको जीवन र मुलुकको अर्थतन्त्रले चुनौती भोग्नुपरेका बेला अनावश्यक खर्च घटाउन मितव्ययिताका लागि गर्नुपर्ने र गर्न सकिने निर्णयका लागि सरकार गम्भीर नभएको कांग्रेसको ठहर छ । व्यापक पीसीआर परिक्षण गरेर साना–ठूला ब्यवसाय क्रमशः सञ्चालन गर्ने दिशामा आवश्यक पहलकदमी र ठोस कार्ययोजना सरकारसँग नदेखिएको, व्यावसायिक क्षेत्रका चुनौतीलाई सहज बनाउन
सरोकारवालाहरूसँग संवादका साथ सहजीकरण प्याकेज निर्माण गर्नतर्फ सरकारको ध्यान नगएको विज्ञप्तिमा उल्लेख छ । लकडाउन जारी रहेकै बेला कर तिर्न ताकेता गर्नुले सरकार गम्भीर र जिम्मेवार नभएर दायित्व र संवेदनाविहीन रहेको पुष्टि भएको कांग्रेसको दाबी छ ।
“नागरिकले तिर्ने करले नै मुलुक चल्ने हो, तर करदाताले प्रतिकूल परिस्थिति भोगिरहेका बेला सहजीकरण गर्ने कर्तव्य र जिम्मेवारी सरकारको हो,” सभापति देउवाले भनेका छन्, “सरकारले त्यो जिम्मेवारी निर्वाह नगरेर अनुदार ढंगले ताकेता गर्दा त्यसलाई भद्र अवज्ञा गर्नुभन्दा अर्को विकल्प नागरिकको रहँदैन ।”
