३२ जेठ, काठमाडौँ ।
प्रमुख प्रतिपक्ष दल नेपाली कांग्रेसले भूमि फिर्ताका लागि भारतसँग कूटनीतिक वार्ताको पहल तत्काल अघि बढाउन आग्रह गरेको छ । प्रतिनिधिसभाबाट दुई तिहाइभन्दा बढी मतले संविधान संशोधन विधेयक पारित भएसँगै भूमि फिर्ताको राष्ट्रिय अभियान दोस्रो चरणमा प्रवेश गरेको कांग्रेसले उल्लेख गरेको छ ।
कांग्रेस प्रवक्ता विश्वप्रकाश शर्माले शनिबार विज्ञप्ति जारी गर्दै भनेका छन्- ‘राष्ट्रियताको पक्षमा आज प्रस्तुत राष्ट्रिय ऐक्यबद्धतापछि अब लिम्पियाधुरा, लिपुलेक र कालापानीमा नेपालको हक निर्बाध ढंगले उपयोग गर्न जरुरी छ र त्यो क्षमता सरकारले प्रस्तुत गर्नुपर्दछ ।’
कांग्रेस राष्ट्रियताको प्रश्नमा संयमतापूर्वक सदैव संस्थागत निणर्य एवं सुस्पष्ट विचारका साथ दृढ ढंगले उभिँदै आएको र आगामी दिनमा पनि कांग्रेस त्यसरी नै उभिने विज्ञप्तिमा उल्लेख छ ।
काेराेना नियन्त्रणमा सरकारकाे ध्यानाकर्षण
त्यस्तै कांग्रेसले राजधानीलगायत देशका विभिन्न स्थानमा केही दिनदेखि भइरहेका प्रदर्शनलाई केपी शर्मा ओली नेतृत्वको सरकारको असफलताका रूपमा लिएको छ । विज्ञप्तिमा भनिएको छ – ‘प्रतिपक्षले निरन्तर दिएको साथ, सुझाव र घचघचावटलाई ओली सरकारले समयमै बुझेको भए न त कोरोनाको संक्रमण यो रूपमा विस्तारित हुने थियो, न यसरी जनआक्रोश बढ्ने थियो ।’
उसले सडकमा प्रदर्शनरत युवाहरूद्वारा अभिव्यक्त जनभावनालाई सम्बोधन गर्न र बल प्रयोग नगर्न चेतावनी दिएको छ । पीसीआर परीक्षण व्यापक गर्न, स्वास्थ्य सामग्री पर्याप्त व्यवस्था गर्न, क्वारेन्टाइनहरूलाई मापदण्डयुक्त बनाउन, विदेशमा अप्ठ्यारोमा रहेका नेपालीहरूको यथाशीघ्र उद्धारका लागि युद्धस्तरमा कार्य गर्नसमेत कांग्रेसले ध्यानाकर्षण गराएको छ ।
