योगेन्द्र योगी
१८ साउन, दोहा ।
कुवेत सरकारले कोरोना भाइरसका कारण बन्द गरेको हवाई उडान पुन: सूचारु गरेको छ । उडान सुरु गरेसंगै कुवेतले नेपालसहित ३१ वटा देशका नागरिकहरुलाई तत्कालका लागि कुवेत प्रवेशमा प्रतिबन्ध लगाएको छ ।
कुवेतको नागरिक उड्डयन महानिर्देशनालयका अनुसार नेपालसहित भारत, इरान, चीन, ब्राजील, कोलम्बिया, अरमेनिया, बङ्गलादेश,फिलिपिन्स, इजिप्ट, श्रीलंका तथा इराक रहेका छन् ।
यस्तै, सिरिया, लेबनान, स्पेन, सिंगापुर, बोसनिया, हर्जेगोविना, मेक्सिको, इंडोनेशिया, चिली, पाकिस्तान, हंगकङ्ग, इटली उत्तरी, मेसिडोनिया, मोल्डोभा, पानामा, पेरू, सर्बिया, मोन्टेनेग्रो र डोमिनिकन रिपब्लीक देशहरुमा उडान स्थगित गर्ने निर्णय भएको जनाएको छ ।
तर उक्त देशका नागरिकले निषेध नगरिएका मुलुकमा १४ दिन बसेमा कुवेत प्रवेशमा अनुमति दिने जनाएको छ । सबै यात्रुहरुले विमानस्थलमा प्रवेश गर्ने र प्रस्थान गर्ने प्रक्रियालाई सहज पार्न सबै स्वास्थ्य प्रक्रियाहरू र निर्देशनहरूको पालना गर्नुपर्ने जनाएको छ ।
यसघि कुवेतले नेपालसहित ७ देशहरुलाई कुवेत प्रवेशमा प्रतिबन्ध लागिएको थियो भने अहिले थप २४ देशहरुबाट कुवेत आउन प्रतिबन्ध लगाएको हाे ।
कुवेतमा विभिन्न कारणले रोजगारी गुमाएका तथा कार्यअबधि पुरा गरि स्वदेश फर्कन पाएका छैनन् भने बिदामा गएका नेपाल श्रमिकहरु कुवेत फर्कन पाएका छैनन् । कुवेतमा विभिन्न क्षेत्रमा गरि करिव ५० हजार नेपाली श्रमिक कार्यरत रहेका छन् ।
