२३ साउन, काठमाडौँ ।
संक्रमित सँगको सम्पर्कमा आएपछि नायक अनमोल केसीको कोरोना परीक्षण गरिएको छ । यमाहा बाइकको विज्ञापनका लागि फोटोसुट गर्ने क्रममा संक्रमितसँग सम्पर्क भएका कारण उनको कोरोना परीक्षण गरिएको हो ।
यमाहाको ब्रान्ड एम्ब्यासडर रहेका अनमोलको केही दिन अगाडि विज्ञापनका लागि फोटोसुट भएको थियो । अनमोल र नायिका उपासना सिंह ठकुरीको फोटोसुटका क्रममा यमाहाको कार्यलयमा काम गर्ने एक जना महिला कर्मचारी पनि उपस्थित थिइन् । ती महिलासहित कोरोना संक्रमण देखिएपछि अनमोल केसी, उपासना सिंह ठकुरी पनि कन्ट्याक्ट ट्रेसिङमा परेका हुन् ।
नायक केसीले आजसम्म रिपोर्ट नआएको बताउँदै सम्भवतः भोली रिपोर्ट आउने जानकारी दिए । उनले भने–‘फोटोसुटको बेलुकी यमाहाको टिमले मलाई जानकारी दिएपछि मैले २ दिन अगाडि कोरोना परिक्षण गरेको छु । तर, रिपोर्ट अहिलेसम्म आइसकेको छैन । सायद, भोलीसम्म आउँछ होला ।’
अनमोल अहिले घरमै आइसोलेसनमा छन् । लकडाउन खुलेसँगै अनमोलले विभिन्न ब्रान्डका विज्ञापनको लागि भिडियो र फोटोसुट गरिरहेका छन् ।