३२ साउन, काठमाडौँ ।
भारतीय क्रिकेटर तथा उत्तरप्रदेश राज्यको सैन्य हित एवम् नागरिक सुरक्षा मन्त्री चेतन चौहानको कोरोना सङ्क्रमणबाट मृत्यु भएको छ ।
भारतीय सञ्चारमाध्यमहरूका अनुसार उपचारको क्रममा उनको आइतबार साँझ निधन भएको हो । कोभिड–१९ बाट सङ्क्रमित ७३ वर्षीय चौहानको स्वास्थ्य अवस्था जटिल बन्दै गएपछि ३६ घण्टादेखि भेन्टिलेटरमा राखिएको थियो । चौहानको अन्त्येष्टि मंगलबार हुने जनाईएको छ ।
भारतीय क्रिकेट टोलीमा ओपनर ब्याट्सम्यानको भूमिकामा रहेपनि पनि उनले एउटै शतक लगाएका छैनन् । उत्तरप्रदेशमा सांसद निर्वाचित हुनुअघिसम्म उनी क्रिकेटको विश्लेषणको भूमिकामा थिए ।
उनको निधनप्रति प्रधानमन्त्री नरेन्द्र मोदी र उत्तरप्रदेशका मुख्यमन्त्री योगी आदित्यनाथले दुःख व्यक्त गरेका छन् । मोदीले चौहानलाई शानदार क्रिकेटरको रुपमा स्मरण गर्दै पछि मेहनती राजनेता बनेको बताएका छन् ।
यसैगरी मुख्यमन्त्री योगीले चौहान जति चर्चित खेलाडी थिए, त्यति नै लोकप्रिय नेता थिए भनेका छन् ।
