४ भदौ, एजेन्सी ।
क्यारेबियन प्रिमियर लिग (सिपिएल) मा नेपाली लेग स्पिनर सन्दीप लामिछाने सम्मिलित जमैका तलावाजले विजयी सुरुवात गरेको छ । बुधबार राती ब्रायन लारा स्टेडियममा भएको खेलमा जमैकाल सेन्ट लुसिया जुक्सलाई ५ विकेटले पराजित गर्दै उत्कृष्ट सुरुवात गरेको हो ।
१ सय ५९ रनको विजयी लक्ष्य पछ्याएको जमैकाले १८.५ ओभरमा ५ विकेटको क्षतिमा पुरा गर्यो । जमैकाका आसिफ अलीले २७ बलमा ५ चौका र २ छक्का सहित ४७ रनमा अविजित रहँदै जित पक्का गरे । कार्लोस ब्रेथवेट ९ बलमा १ चौका र १ छक्का सहित १८ रनमा अविजित रहे ।
ओपनर चाडविक वाल्टन २ रनमा आउट भए । ओपनर ग्लेन फिलिप्सले २९ बलमा ३ चौका र ३ छक्का सहित ४४ रन बनाउँदै राम्रो अवस्थामा पुर्याएका थिए । फिलिप्सलाई केस्रिक विलियम्सले ११ औं ओभरको पाँचौ बलमा क्याच आउट गराएका थिए ।
केस्रिक विलियम्सले १७ औं ओभरको पहिलो बलमा आन्द्रे फ्लेक्चरबाट आन्द्रे रसेललाई १६ रनमा क्याच आउट गराएपछि जमैका दबाबमा परेको थियो । जुक्सका केस्रिक विलियम्सले ४ ओभरमा ३२ रन खर्चेर २ विकेट लिए । रहकिम कर्नवाल, स्कट कुग्गेलेइजन र आबेद म्याकोयले १–१ विकेट लिए । त्यसअघि टस हारेर ब्याटिङ गरेको जुक्सले निर्धारित २० ओभरमा ७ विकेटको क्षतिमा १ सय ५८ रन बनाएको थियो। जुक्सका लागि रोस्टन चेशले ४२ बलमा ४ चौका र २ छक्का सहित सर्वाधिक ५२ रनको योगदान दिए । चेशलाई १९ औं ओभरको तेस्रो बलमा मुजिब उर रहमानले ओशान थोमसबाट क्याच आउट गराए ।
दोस्रो ओभरको अन्तिम बलमा विरसामी पेरुमलले ओपनर रेहकिम कर्नवाललाई कप्तान रोभमान पोवेलबाट ९ रनमा क्याच आउट गराए । उनले ९ बलमा २ चौका प्रहार गरे । पेरुमललेनै चौथो ओभरको अन्तिम बलमा मार्क डियाललाई चाडविक वाल्टनबाट ६ बलमा १ चौका र २ छक्का सहित १७ रनमा पेभिलिएन फर्काए ।
आठौं ओभरको दोस्रो बलमा आन्द्रे रसेललाई ठूलो सट खेल्ने क्रममा आन्द्रे फ्लेक्चर २२ रनमा कार्लोस ब्रेथवेटबाट क्याच आउट भए । १५ औं ओभरको दोस्रो बलमा सन्दीपले नाजिबउल्लाह जद्रानलाई २५ रनमा क्याच आउट गराए । सन्दीपले महत्वपूर्ण विकेट लिनुको साथै चेशसँगको ५२ रनको साझेदारी पनि तोडेका थिए ।
मुजिब उर रहमानले मोहम्मद नाबीलाई १३ रनमा कट एण्ड बोल्ड आउट गरे । विरसामी पेरुमलले ३ ओभरमा ३४ रन खर्चेर २ विकेट लिए । मुजिब उर रहमानले ४ ओभरमा २५ रन खर्चेर २ विकेट लिए । सन्दीपले ४ ओभरमा २३ रन खर्चेर १ विकेट लिए । आन्द्रे रसेलको नाममा १ विकेट रह्यो ।
सन्दीप सम्मिलत जमैकाले शुक्रबार बिहान ट्रीनबेगो नाइट राइडर्सविरुद्ध खेल्ने छ ।
