७ असोज, काठमाडौं । काठमाडौं उपत्यका सडक विस्तार आयोजनाले युनाईटेड बिल्डर्स एण्ड ईन्जिनियर्स प्रा.लि. र दिवा शैलुङ जेभीलाई कारबाही गर्ने भएको छ ।
यी दुई कम्पनीलाई कालोसूचीमा राख्न नपर्ने कुनै कारण भए ७ दिनभित्र स्पष्टिकरणसहित आधिकारिक प्रतिनिधि उपस्थित हुन आग्रह गरेको छ ।
यी दुई कम्पनीले गरेको आयोजना निर्माणका काम सम्झौताको शर्त अनुसार पुरा हुन नसकेको र कोरोना भाईरस सङ्क्रमणको कारण देखाएर थप मागिएको समयभित्र पनि काम गर्न चासो नदेखाएको आयोजनाले जनाएको छ ।
७ दिनभित्र स्पष्टिकरणसहित कम्पनीका आधिकारिक प्रतिनिधि उपस्थित नभए कारबाही प्रक्रिया अघि बढाइने आयोजनाले सूचना प्रकाशन गरेर जानकारी गराएको हो ।
युनाईटेड विल्डर्स एण्ड ईन्जिनियर्स प्रालिले काठमाडौंको जोरपाटी–चावहिल–साँखु रोड र दिवा शैलुङ जेभीले ललितपुरको ढोलाहिटी– सुनाकोठी–चापागाउँ सडकखण्ड निर्माणको जिम्मा पाएको थियो ।
