१२ असोज, काठमाडौं । सरकारले भैरहवामा निर्माणाधीन गौतमबुद्ध अन्तर्राष्ट्रिय विमानस्थलमा ग्राउन्ड ह्यान्डलिङ सुविधा तत्कालका लागि नेपाल एयरलाइन्सलाई दिने तयारी गरेको छ ।
उक्त प्रयोजनका लागि संस्कृति, पर्यटन तथा नागरिक उड्डयन मन्त्रालय र नेपाल नागरिक उड्डयन प्राधिकरणसँग प्रस्ताव गरिएको नेपाल एयरलाइन्सका कार्यकारी अध्यक्ष सुशील घिमिरेले जानकारी दिए ।
सरकारले गौतमबुद्ध विमानस्थल व्यवस्थापनको जिम्मा निजी पार्टीलाई दिने बताएको थियो । तर, कोरोना भाइरसको महामारीपछि तत्काल निजी पार्टी आउने सम्भावना छैन । सोही कारण अहिले प्राधिकरणबाटै विमानस्थलको व्यवस्थापन हुनेछ । त्यो अवस्थामा ग्राउन्ड ह्यान्डलिङ सेवा नेपाल एयरलाइन्सले पाउनुपर्ने प्रस्ताव नेपाल एयरलाइन्सको छ ।
कम्पनीसँग त्रिभुवन विमानस्थलमा ग्राउन्ड ह्यान्डलिङ सेवाको लामो अनुभव, दक्ष कर्मचारी र उपकरण समेत रहेका कारण नयाँ विमानस्थलमा सेवा बिस्तार गर्न समस्या नहुने कार्यकारी अध्यक्ष घिमिरेले बताए ।
