७ मंसिर, वीरगञ्ज ।
भन्सार छली भित्र्याउदै गरेको तस्करीको सामान नियन्त्रणमा लिने क्रममा आज अपरान्ह वीरगञ्जको नेपाल भारत सिमा नजिकै प्रहरी र तस्करबीच झडप भएको छ ।
झडपको क्रममा अस्थाई प्रहरी चौकी इनर्वाका इन्चार्ज जय प्रकाश पाण्डे घाइते भएका छन् । तस्करहरुको आक्रमणबाट पाण्डेको नाकमा गहिरो चोट लागेको छ ।
घाइते पाण्डेको नारायणी अस्पतालमा उपचार भईरहेको छ । प्रहरीलाई कुटपिट गर्ने दुई जना तस्करलाई प्रहरीले पक्राउ गरेको छ भने अन्य तस्कर फरार रहेका छन् ।
पक्राउ पर्नेहरुमा वीरगञ्ज छपकैयाका मुन्ना सेट्टी र मिना देवि रहेको जिल्ला प्रहरी कार्यालय पर्साकी प्रहरी उपरिक्षक गंगा पन्तले जानकारी दिए।
प्रहरीलाई कुटपिट गर्ने अन्य तस्कर समुहको खोजी भईरहेको र घटनाका बारेमा थप अनुसन्धान भईरहेको पर्सा प्रहरीले जनाएको छ ।
