१५ मंसिर, काठमाडौं । अन्तराष्ट्रिय क्रिकेट परिषद (आईसीसी) को कारण नेपाली राष्ट्रिय क्रिकेट टिमको मुख्य प्रशिक्षक नियुक्तिमा ढिलाइ हुने भएको छ ।
नेपाल क्रिकेट संघ क्यानले आफ्नो तयारी पुरा गरेपनि आईसीसीसँगको समन्वयमा प्रशिक्षक नियुक्ति गर्नुपर्ने भएकाले थप दुई हप्ता ढिलाई हुने भएको हो । यस अघि क्यानले मंसिरको दोस्रो हप्ता मुख्य प्रशिक्षक सार्वजनिक गर्ने बताएको थियो । आईसीसी आफ्नो निर्वाचनमा व्यस्त रहेको र अहिले क्यानले गरेको कामको मुल्यांकन गरिरहेको कारण मुख्य प्रशिक्षक घोषणामा ढिलाई भएको क्यानले बताएको छ । क्यानले गत नोभेम्बर १४ मा मुख्य प्रशिक्षकका लागि आवेदन परेको मध्येबाट १२ जनाको अन्तर्वार्ता लिएको थियो । यस्तै अन्तर्वार्तापछि क्यानले मंसिर दोस्रो साता मुख्य प्रशिक्षक घोषणा गर्ने बताएको थियो । नेपाली टिम लामो समयबाट मुख्य प्रशिक्षक विहीन रहदै आएको छ । गत फेब्रुअरीमा नेपालमा भएको विश्वकप लिग–२ अन्तर्गतको घरेलु सिरिजपछि तत्कालीन मुख्य प्रशिक्षक उमेश पटवालले राजीनामा दिएका थिए । त्यसयता नेपाली टिमको मुख्य प्रशिक्षक पद खाली रहँदै आएको छ । हाल नेपाली टिम राष्ट्रिय खेलकुद परिषद (राखेप) का प्रशिक्षक जगत टमटाको नेतृत्वमा बन्द प्रशिक्षणमा रहेका छन् । यस्तै क्यानले मनोज कटुवाललाई सहायक प्रशिक्षकमा नियुक्त गरेको छ ।
