१९ मंसिर, विराटनगर।
प्रदेश १ का स्थानीय तहहरुमा विद्युतिय आपुर्ती व्यवस्थापन सूचना प्रणाली कार्यन्वयन गरिने भएको छ । आपुर्ति व्यवस्थापन सूचना प्रणाली कार्यान्वयनका लागि स्थानीय तहका स्वास्थ्य संयोजक र कार्यक्रम हेर्ने फोकल पर्सनलाई इएलएमआईएस संवन्धि अभिमुखीकरण सुरु गरिएको छ ।
विराटनगरमा शुक्रबारदेखि सुरु भएको अभिमुखीकरणको उद्घाटन गर्दै सामाजिक विकास मन्त्री जीवन घिमिरेले सूचना प्रणाली व्यवस्थित नहुँदा समस्या हुने गरेको बताए । तीन तहको सरकारका कारण पनि सूचना प्रणालीमा केही समस्या भएको उनले बताए । मन्त्री घिमिरेले भने,‘ कानुनगत समस्याका कारण रिपोर्टिङमा समस्या छ । रिपोर्टिङ प्रकृया झन्झटिलो भएकाले सिधै समन्वयका लागि सहजीकरणको प्रवन्ध हुँदै गएको उनले बताए । संविधानको भावना र मर्म तीन तहवीच समन्वय, सहकार्य र सहजीकरणको सिद्धान्तलाई तीन तहको सरकारले आत्मासाथ नगरेको मन्त्री घिमिरेले गुनासो गरे ।
स्वास्थ्य तथा जनसंख्या मन्त्रालय स्वास्थ्य सेवा विभागका एकिकृत स्वास्थ्य सूचना व्यवस्थापन शाखा प्रमुख बद्रिनाथ ज्ञवालीले देशभरको सूचना प्रणालीलाई एकद्वार बनाउने नीति अनुसार कार्यक्रम कार्यन्वयन गर्दै लगिएको बताए । उनले ७ वटै प्रदेशमा अभिमुखीकरणको काम भईरहेको बताए ।
सामाजिक विकास मन्त्रालय प्रदेश स्वास्थ्य निर्देशनालयको आयोजनामा शुक्रबारदेखि मोरङ, सुनसरी र झापाका तीन जिल्लामा अभिमुखीकरण शुरु भएको छ । आगामी १० दिन भित्रमा १ सय ३७ वटै स्थानीय तहमा कार्यक्रम कार्यन्वयनका लागि अभिमुखीकरण गरिसकिने प्रदेश स्वास्थ्य निर्देशनालयका निमित्त प्रमुख डा. सुरेश महेताले बताए ।
युएस एड जिएचएससी पिएसएम परियोजनाको आर्थिक तथा प्राविधिक सहयोगमा शुरु अभिमुखीकरण पछि आपुर्ति व्यवस्थापनमा सहज हुने डा. मेहताले बताए । प्रदेश १ का स्वास्थ्य कार्यालयहरु र जिल्ला अस्पतालहरुमा भने विद्युतिय आपुर्ती व्यवस्थापन सूचना प्रणाली कार्यान्वयनमा आईसकेको डा. मेहताले बताए ।
युएसएड जिएचएससी पिएसएम प्रोजेक्टका कन्ट्री डाईरेक्टर म्याक्स कवालिसाले आपुर्ति व्यवस्थापन सूचना प्रणालीले औषधि र औषधिजन्य सामाग्रीको सहि तथ्याङक थाहा हुनुका साथै सुशासन कायम गर्न सहयोग पुग्ने बताए ।
