२९ मंसिर, काठमाडौं । आन्दोलनरत उखु किसानले सरकारसँग वार्ता गर्न अस्वीकार गरेका छन् ।
उद्योग, वाणिज्य तथा आपूर्तीमन्त्री लेखराज भट्टले आज उद्योगीसहित आन्दोलनरत किसानलाई छलफलका लागि मन्त्रालयमा बोलाएका थिए । तर उनीहरु आउन नमानेको मन्त्रालय स्रोतले जनाएको छ । मन्त्री भट्टले उद्योगीहरुसँग भने मन्त्रालयमा छलफल गरेका छन् । सो क्रममा उद्योगीहरुले किसानको बक्यौता रकम भुक्तानी गर्ने प्रतिवद्धता जनाएको बताइएको छ । विभिन्न उद्योगहरुबाट ८० करोडभन्दा बढी रकम दिन बाँकी रहेको भएपनि किसानले अझै पाएका छैनन् । मंसिर ९ गते पनि मन्त्री भट्टले उद्योगीसँग छलफल गरेका थिए । त्यो छलफलमा पनि उनीहरुले एक महिनाभित्र किसानको बक्यौता रकम भुक्तानी गर्ने प्रतिवद्धता जनाएका थिए । त्यो प्रतिवद्धता जनाएको एक महिना नपुग्दै किसानहरुले आन्दोलन शुरु गरेका हुन् । आजको छलफलमा पनि उद्योगीले छिट्टै किसानको बक्यौता रकम बुझाउने प्रतिवद्धता जनाएको मन्त्रालयका सहप्रवक्ता उर्मिला केसीले बताइन् । मन्त्री भट्टलले किसानलाई दिनुपर्ने रकम कुन अवस्थामा छ, कति तिर्नु पर्ने हो सबै कुरा उल्लेख गरि सार्वजनिक गर्न उद्योगीहरुलाई आग्रह गरेका छन् ।
