४ पुस, काठमाडौं ।
प्रधानमन्त्री तथा नेकपा अध्यक्ष केपी शर्मा ओली पार्टीका कार्यकारी अध्यक्ष पुष्पकमल दाहाल (प्रचण्ड)लाई भेटेर फर्किएका छन् ।
साढे १ घण्टा छलफल गरेपछि ओली प्रचण्ड निवास खुमलटारबाट फर्किएका हुन् । खुमलटारको छलफलपछि ओली गृहमन्त्री रामबहादुर थापालाई भेट्न पुल्चोकमा गएका छन् ।
पार्टीभित्रको विवाद उत्कर्षमा पुगिरहेका बेला ओली बिहान प्रचण्ड भेट्न खुमलटार गएका थिए । उनीहरूबीच केके विषयमा छलफल भयो भन्नेबारे भने बाहिर आइसकेको छैन ।
ओली-प्रचण्डबीच छलफल चलिरहेका बेला उपाध्यक्ष वामदेव गौतम पनि खुमलटार पुगेका थिए । आधा घण्टा छलफलमा बिताएपछि वामदेव पनि खुमलबाटर बाहिरिएका छन् ।
अहिले खुमलटारमा प्रचण्ड र पार्टीका वरिष्ठ नेता माधवकुमार नेपालबीच छलफल भइरहेको स्रोतले बताएको छ ।
