५ पुस, दाङ ।
झोलुङ्गे पुलमा झुण्डिएर टिकटक बनाउन खोज्दा खसेर एक युवक गम्भीर घाइते भएका छन् ।
तुलसीपुर उपमहानगरपालिका १९ बिजौरीका २४ बर्षीय रमेश थापा बबइ गाउँपालिका ५ पुरन्धारा झरना नजिकैको झुलुङ्गे पुलबाट लडेर गम्भीर घाइते भएका छन् ।
घाइते थापालाई उद्धार गरी राप्ती प्रादेशिक अस्पताल तुलसीपुरमा प्रारम्भीक उपचार पछि थप उपचारका लागि बाँकेको कोहलपुर मेडिकल कलेजमा लगिएको छ ।
इलाका प्रहरी कार्यालय तुलसीपुरका प्रमुख डिएसपी शिबबहादुर सिंहले शनिवार दिउँसो सवा २ बजेतिर टिकटक बनाउन भन्दै पुलमा झुण्डिएका थापा लडेर गम्भीर घाइते भएका थिए । संगै गएका साथीहरुले उद्धार गरि उनलाई अस्पताल पुर्याएका थिए ।
तुलसीपुरमा उपचार संभव नभएपछि शनिवार बेलुका सवा ६ बजेतिर घाइते थापालाई कोहलपुर रेफर गरिएको थियो ।
शनिवार रमाईलो गर्ने भन्दै २५–२६ जना साथीहरु मिलेर पर्यटकीय स्थल पुरन्धारा झरनामा पिकनिक खान गएको समयमा थापा टिकटक बनाउन भन्दै बबई नदीमा निर्मित झुलुङ्गे पुलको सपोट तारमा झुण्डिएको सयममा त्यहीबाट खसेका हुन् ।
थापाको टाउको, अनुहार, छातिमा चोट लागेको प्रहरीले जनाएको छ ।
