३ माघ, काठमाडौं ।
नेपाल कम्युनिस्ट पार्टी (नेकपा) ओली समूहको स्थायी कमिटी सदस्य सुवास नेम्वाङले प्रधानमन्त्री केपी शर्मा ओलीलाई किन अवरोध गरेको भन्दै प्रश्न गरेका छन् ।
नेकपा ओली समूहको प्रदेश १ भेलालाई शनिबार काठमाडौंमा सम्बोधन गर्दै नेम्वाङले प्रधानमन्त्री ओलीको नेतृत्वमा देश स्थिरता र समृद्धिको दिशामा अघि बढिरहेका बेला त्यसलाई अस्वीकार गरेर राम्रो काम नगरिएको बताएका हुन्।
उनले ओलीलाई पार्टीका नेताहरुबाट अवरोध भएको पनि बताएका छन् । “महाधिवेशनबाट नयाँ पुस्तालाई अध्यक्ष र प्रधानमन्त्री बनाउँछु म कक्षा दोहोर्याउने विद्यार्थी होइन भन्नुभएको थियो । यस्तो बेलामा हामी किन यहाँ आइपुग्यौं ।
केपी ओलीलाई किन अवरोध ? बाटो छेकिन्छ,’’ उनले भने । उनले ओलीलाई कारबाही गरेर माधवकुमार नेपालप्रति कटाक्ष गरे । “ मैले नाम बिसिएँ, केपी कमरेडलाई कारबाही गरेर अध्यक्ष बन्नुभो रे ।
केहीअघि केपी शर्मा ओलीसँग हार्नुभएको थियो रे । अहिले उहाँले केपी कमरेडलाई हटाएर अध्यक्ष बन्नुभो रे । कस्तो सजिलो र’छ । थाहै थिएन,’’ नेम्वाङले भने ।
केपी ओलीलाई नपत्याएर के गर्न खोजेको भन्ने प्रश्न देशले खोजिरेहको उनले बताए । केपी ओलीलाई पाँच वर्षका लागि प्रधानमन्त्री मानेर जिताएर पठाएको पाँच वर्ष नपुग्दै फेरि त्यही स्थितिमा फर्कनुपरेको बताए ।
उनले प्रधानमन्त्री केपी ओलीलाई अस्वीकार गरेर गर्न खोजिएको के हो भन्दै प्रचण्ड–नेपाल समूहलाई प्रश्न गरेका छन्। ‘प्रधानमन्त्री केपी ओलीलाई अस्वीकार गरेर गर्न खोजिएको के हो ? देशले त्यसको जवाफ खोजिरहेको छ।
मेचीदेखि महाकालीसम्मका कार्यकर्तापंक्तिले जवाफ खोजिरहेका छन्, उनले प्रश्न गरे।
