१९ माघ, विराटनगर ।
विराटनगर महानगरपालिका भित्रका थप १० वटा सडक कालो पत्रे बन्ने भएका छन् । संघीय सरकारको भौतिक तथा पूर्वाधार मन्त्रालयको बजेटमा सडक बन्न लागेका हुन् । नेकपाका महानगर कमिटि अध्यक्ष सागर थापाले केही दिनअघि भौतिक पूर्वाधार मन्त्री बसन्त नेम्वाङसँग सडक कालोपत्रेका लागि डेलिकेसन गएपछि विराटनगरका सडक कालोपत्रे बन्ने भएका हुन् ।
थापाका अनुसार लामो समयदेखि सडक बनेपनि कालोपत्रे हुन नसकेका ती सडकमा केही समयभित्रै कालोपत्रे हुनेछन् । यसका लागि विराटनगरस्थित डिभिजन सडक कार्यालयले सोमबार टेण्डर समेत आह्वान गरेको छ । थापाका अनुसार विराटनगर ५ स्थित सिटी रुट अन्तर्गत विराटनगर ५ को वडा कार्यलयदेखि शान्तिचौकसम्म, वडा नम्बर २ को मुनाल मार्ग हुदै सोमबारे मार्गसम्म, वडा नं. १२ को पञ्चमुखी चौकदेखि मंगलबारे हाटियासम्म, वडा नं. ४ को सगरमाथा एकलबिया मार्ग, बाबाकुटी संजीवनी मार्ग, आर्यवेदिक मार्गमा कालोपत्रे हुने छन् ।
यस्तै विराटनगर ८ को संगम मार्ग, वडा नं. १७ को हिमालय मार्ग, वडा नं. ११ को जनसहयोग मार्ग, ६ को अमान मार्ग कालोपत्रे हुने भएको छ । सबै मार्गको दुरी करिब ४ किलोमिटर र लागत ५ करोड रुपैयाँ हुने डिभिजन सडक कार्यालय विराटनगरले जनाएको छ । कार्यालयका इन्जिनियर सुधिर कुमार झाका अनुसार टेण्डर प्रक्रिया सुरु भइसकेकोले आवश्यक प्रक्रिया पूरा गरि कामलाई अगाडी बढाइने छ ।
