३ फागुन, विराटनगर ।
प्रदेश १ सरकार स्थापनाको तेस्रो वार्षिकोत्सव सोमबार मनाइँदैछ ।
मुख्यमन्त्री कार्यालयमा आयोजना गरिएको तेस्रो वार्षिकोत्सव कार्यक्रममा प्रमुख विपक्षीदल नेपाली काँग्रेस र नेकपाको दाहाल–नेपाल समूहले बहिष्कार गरेका छन् ।
अघोषितरुपमा वार्षिकोत्सवको कार्यक्रम बहिस्कार गरेको दाहाल–नेपाल समूहका नेताहरु कार्यक्रममा सहभागी भएनन् । दाहाल–नेपाल समूहका नेता इन्द्र आङ्बोले वैधता सकिएको सरकारको कार्यक्रममा सहभागी नभएको उल्लेख गरे ।
‘सरकारको वैधता सकिएको छ,’ उनले भने, ‘वैधता सकिएको सरकारको वार्षिकोत्सबमा सहभागी हुन आवश्य ठानेनौं ।’ वार्षिकोत्सवमा नेपाली कांग्रेसले पनि सहभागिता जनाएको छैन ।
कांग्रेस प्रमुख सचेतक केदार कार्कीले पार्टीको कार्यक्रम भएकाले सहभागी नभएको बताए । संसद् छल्दै हिँडेका कारण पार्टीकोतर्फबाट सहभागिता नभएको उनको भनाइ छ । ‘खबर आएको थियो तर जान आवश्यक ठानेनौं,’ उनले भने, ‘पार्टीको कार्यक्रम पनि छ । सरकार संसद छल्नतर्फ लागेको छ ।’
तर कांग्रेसबाट सांसद विन्दिया कार्की सहभागी भएकी छन् । प्रदेश प्रमुख सोमनाथ अधिकारी प्यासीको प्रमुख आतिथ्यमा आयोजित कार्यक्रममा प्रदेश सरकारको काम जनप्रिय बन्दै गएको दाबी गरिएको छ ।
प्रदेश प्रमुख प्यासीले तीन वर्षमा सरकारले गरेका कार्य प्रगतिसमेत प्रस्तुत गरे ।
