१० फागुन, विराटनगर । युथ कांग्रेसमा आवद्ध युवाहरुले सोमबार विराटनगरको सडकमा बसेर संविधान पढेका छन् ।
युथ कांग्रेस मोरङको आयोजनामा जिल्ला प्रशासन कार्यालय अगाडी भेला भएका युवाहरुले सरकारका कदम असंवैधानिक तथा अलोकतान्त्रिक भन्दै विरोध गरेका हुन् । विरोध प्रदर्शनमा सहभागी युथ कांग्रेसका प्रदेश १ संयोजक सविन दाहालले संविधानको रक्षाका लागि युवाहरु सडकमा उत्रिनुपरेको बताए । उनले सरकारलाई सच्चिएर संविधान रक्षाका लागि जुट्न आग्रह गरे । यस्तै युथ कांग्रेस मोरङका अध्यक्ष अभिषेक भट्टराईले प्रधानमन्त्रीले संविधानमाथि गरेको प्रहारप्रति असन्तुष्टि जनाउँदै विरोध गर्नुपरेको बताए ।
विरोध प्रदर्शनपछि युवाहरुले प्रमुख जिल्ला अधिकारी मार्फत प्रधानमन्त्रीलाई संविधानको पुस्तक सहित ज्ञापनपत्र हस्तान्तरण गरे । संविधानको पुस्तक र ज्ञापनपत्र बुझ्दै मोरङका प्रमुख जिल्ला अधिकारी कोशहरि निरौलाले चाँढो प्रधानमन्त्री कार्यालयमा पठाउने बताए । प्रधानमन्त्री केपी शर्मा ओलीले पुष ५ गते प्रतिनिधिसभा विघटन गरेपछि त्यसको विरोधमा देशभर निरन्तर प्रदर्शन हुदै आएको छ ।
