१ चैत, काठमाडौं । पछिल्लो समय कम्युनिष्ट पार्टी टुटफुट, नेताहरु तितरबितरको गञ्जागोलमा फँसेका छन् ।
नेकपा एमाले र माओवादी केन्द्र एकिकृत भई बनेको पार्टी नेकपालाई सर्वोच्च अदालतले खारेज गरेपछि पुरानो पार्टी त ब्यूँतियो तर नेताहरु तितरबितर छन् । ब्यूँतिएको पार्टी पनि एकजुट बन्न सकेन । एमाले फुटको संघारमा पुगेको छ भने प्रभावशाली नेताहरु एमाले मै रहँदा माओवादी केन्द्रको अस्तित्व कमजोर छ । नेकपा खारेज पछि न एमाले बन्न सक्यो न माओवादी केन्द्र नै । यही गञ्जागोल कै बीचमा एमालेका अध्यक्ष केपी शर्मा ओली वैधानिक रुपमा नेकपा एमालेका अध्यक्ष हुन् तर आफु नेकपा मै रहेको बताउँछन् । यद्यपी उनले एमालेलाई एकजुट बनाउन सकेका छैनन् । एमालेको ठूलो खेमा समानान्तर संरचना खडा गरेर पार्टी भित्रै विद्रोहमा लागेको छ । अध्यक्ष ओलीको प्रभावमा माओवादी केन्द्रका ७ सांसद एमाले मै रहँदा माओवादी केन्द्र पूर्ण बन्न सकेको छैन । दशकौंको टुटफुटपछि एकिकृत ठूलो कम्युनिष्ट पार्टी बनेपनि नेतृत्वकर्ताहरुको अकर्मण्यता र पदीय लालचले कम्युनिष्ट पार्टी फेरी पनि टुक्रिएको मात्रै छैन कम्युनिष्टहरुको चरित्रमाथि नै दाग लागेको छ । ठूलो कम्युनिष्ट पार्टी बनेर करिब दुईतिहाई बहुमतको सरकार नेतृत्व गरिरहेको बेला उपलब्धि जोगाउन नसक्नु त बामपन्थी दलको कमजोरी त हो नै, राजनीतिक स्थायित्वमाथि हमला गर्दै देशलाई अस्थिरताको भूमरीमा लैजानुको दोष पनि उनिहरुमाथि नै लागेको छ । अझ पछिल्लो समयमा यो दोष पखाल्न लाग्नुपर्नैमा उनीहरु अझै दोष नै बढाईरहेका छन् ।
