६ चैत्र, काठमाडौँ ।
थापाथलीस्थित नर्भिक इन्टरनेशनल हस्पिटलमा उपचारारत नेपाली कांग्रेसका नेता तथा पूर्वमन्त्री नवीन्द्रराज जोशीको स्वास्वस्था बुझ्न नेपाल सरकारका उपप्रधानमन्त्री ईश्वर पोखरेल अस्पताल पुगेका छन् ।
पोखरेलले बिहान साढे ९ बजे नर्भिक अस्पतालमा आएर कांग्रेस नेता जोशीको पछिल्लो स्वास्थ्य अवस्थाको विषयमा जानकारी लिएका थिए। सो क्रममा उनले जोशीको शीघ्र स्वास्थ्यलाभको समेत कामना गरेका थिए।
उपप्रधानमन्त्री पोखरेललाई नर्भिक अस्पतालका चिकित्सकहरुले जोशीको पछिल्लो स्वास्थ्य अवस्थाको विषयमा अपडेट गराएका थिए।
शुक्रबार बिहान जोशीको स्वास्थ्य अवस्था बुझ्दै उनको उपचारमा सरकारले रु. १० लाख सहयोग गर्ने पोखरेलले जानकारी गराएका छन् । जोशीको परिवारका सदस्यहरुलाई उनले यस्तो जानकारी गराएका हुन्।
पोखरेल १५ मिनेटजति अस्पतालमा बसेर फर्किएका थिए। गत फागुन १४ गते मष्तिष्कघात भई नर्भिक इन्टरनेशनल अस्पतालमा भर्ना गरिएका नेता जोशीको भेन्टिलेटरमा राखेर उपचार जारी राखिएको छ।
उपचार सुरु भएको केही दिनपछि उनको अवस्थामा सुधार देखिएसँगै भेन्टिलेटरबाट बाहिर निकालिएको थियो। तर, त्यसको केही दिनपछि स्वास्थ्य अवस्था पुनः बिग्रिएपछि पुनः भेन्टिलेटरमै राखेर उपचार जारी राखिएको छ।
जोशीको अहिलेको अवस्था गम्भीर रहेको र उनी कोमामा रहेका उपचारमा संलग्न वरिष्ठ न्यूरो सर्जन डा. राजीव झाले बताए।
