१० असार, एजेन्सी ।
कोरोना भाइरस संक्रमणमुक्त भएको इजारायलमा फेरि संक्रमण देखिन थालेको छ।
सोमबारबाट १०० भन्दा बढीमा फेरि संक्रमण देखिन सुरु भएको हो। बुधवार पनि १०० जना भन्दा बढीमा संक्रमण देखिएको स्थानीय संचारमाध्यमले उल्लेख गरेका छन्।
इजरायलका नवनियुक्त प्रधानमन्त्री नाफताली बेन्नेटले देशमा फेरि संक्रमण बढेको भन्दै सतर्कता अपनाउन आग्रह गरेका छन्। साथै उनले अत्यावश्यक काममा बाहेक विदेश नजान पनि भनेका छन्।
यो आदेश होइन। यो आग्रह हो, उनले भने, अझै केही दिन १०० भन्दा बढी संक्रमित देखिएमा यो आदेश हुनेछ। इजरालय संक्रमण मुक्त भएपछि गत हप्ता मास्क नीति खुकुलो गरिएको थियो।
अब भने विमानस्थलमा मास्क अनिवार्य गरिने भएको छ। विमानबाट आउनेहरुले भने आफू इजरायलमा बसेसम्म मास्क लगाउनुपर्ने भएको छ। बाहिरबाट आउने सबैको अनिवार्य पीसीआर टेस्ट हुनेछ।
यस्तै, प्रधानमन्त्री बेन्नेटले नागरिकहरुलाई इन्डोर इभेन्टमा मास्क लगाउन आग्रह गरेका छन्। बेनजानिम नेतान्याहूले बहुमत पुर्याउन नसेकेपछि गतहप्ता बेन्नेट नेतृत्वको सरकार गठन भएको थियो।
उनले आफ्नो सरकारले कोरोना भाइरस क्याबिनेटलाई पुनः स्थापित गरेर कोभिड १९ नियन्त्रण र रोकथामका लागि काम गर्ने बताए।
इजरायलमा निकै संक्रामक मानिएको डेल्टा भेरियन्ट कै कारण अहिले फेरि संक्रमण देखिएको हो। ७० प्रतिशत नयाँ केस डेल्टा भेरियन्टकै कारण भएको बताइएको छ।
